අනාරක්ෂිතව යතුරුපැදියේ ගිය තරුණයන් දෙදෙනෙකුගෙන් අයෙක් මරුට

හෝමාගම, මොරගහහේන පාරේ හල්ගහදෙණිය ප්‍රදේශයේදී අද (24දා) යතුරු පැදියක් වෑන් රථයක ගැටීමෙන් සිදු වූ අනතුරකින් තුවාල ලැබූ යතුරු පැදියේ ගමන්ගත් තරුණයන් දෙදෙනා ප්‍රතිකාර සඳහා හෝමාගම මූලික රෝහලට ඇතුළත් කිරීමෙන් පසුව, ඉන් එක් තරුණයෙකු ජීවිතක්‍ෂයට පත්ව ඇතැයි හෝමාගම පොලීසිය පවසයි.

අනෙක් තරුණයාගේ තත්ත්වයද බරපතළ බව රෝහල් ආරංචි මාර්ග පවසයි.

මෙසේ මියගොස් ඇත්තේ වැලිමඩ වැරැල්ලන්ද ප්‍රදේශයේ පදිංචි රත්නායක මුදියන්සේලාගේ දර්ශණ නිවන්තක (30) නමැති අවිවාහක තරුණයෙකි.

අනතුරට පත් තරුණයින් දෙදෙනා තම නිවසේ පැවැති සාදයකට අවශ්‍ය ද්‍රව්‍ය කිහිපයක් රැගෙන ඒම සඳහා හෝමාගම ප්‍රදේශයට ගොස් නැවත නිවසට පැමිණෙන අතරතුරදී මෙම අනතුර සිදුව ඇති බවත්, මාර්ගයේ ධාවනය වූ ත්‍රිරෝද රථයකට ඉස්සර කිරීමට යෑමේදී, විරුද්ධ දෙසින් පැමිණි, වෑන් රථයේ යතුරු පැදිය ගැටීමෙන් මෙම අනතුර සිදුව ඇති බවත් පොලීසිය පවසයි.

අනතුර සිදුවන අවස්ථාවේදී තරුණයන් දෙදෙනා අධික ලෙස මත්පැන් පානය කර සිට ඇති බවත්, ආරක්ෂක හිස්වැසුම් නොපැලඳ සිට ඇති බවත් අනාවරණය වී ඇතැයි පොලීසිය පවසයි.

යතුරපැදිය වෑන් රථය සහ එහි රියදුරු අත්අඩංගුවට ගෙන හේමාගම අධිකරණයට ඉදිරිපත් කිරීමට නියමිතව තිබිණි.

සිද්ධිය සම්බන්ධයෙන් හෝමාගම පොලීසියේ රථවාහන අංශයේ ස්ථානාධිපති උ.පො.ප මෙන්ඩිස් ඇතුළු නිලධාරීහු පරීක්ෂණ පවත්වති.

මත්තේගොඩ - ශාන්ත ප්‍රදීප් කුමාර කුලරත්න