UL891 ශ්‍රී ලංකන් යානය බැංකොක් වෙත හදිසි ගොඩබෑම

ශ්‍රී ලංකන් ගුවන් සමාගමට අයත් A330-200 ගුවන් යානාවක් ඊයේ  (7දා) එහි වායු සමීකරණ පද්ධතියේ ඇතිවූ දෝෂයක් හේතුවෙන් ගුවන් මැදිරි තුළ දුමක් පැතිරයාම නිසා නැවත බැංකොක් ස්වර්ණභූමි ගුවන් තොටුපළ වෙත ආරක්ෂිතව ගොඩබැස්සවීමට කටයුතු කර ඇත. මේ අවස්ථාවේ දී ගුවන් යානයට හෝ එහි ගමන් ගත් මගීන් 263 දෙනෙකු ඇතුළු  කාර්ය මණ්ඩලයට කිසිදු අනතුරක් සිදුවී නොමැත.

ඊයේ රාත්‍රියේ දී පැය2209ට  UL 891 ගුවන් යානය බැංකොක් සිට කොළඹ බලා පිටත් වී ඇත. ගුවන් ගමන සිදුවී මිනිත්තු 19 කින් පසුව මෙම දුම් තත්වය ගුවන් මැදිරි තුළ පැතිරී ඇත. මේ අනුව ගුවන් යානයේ සිටි මෙහෙයුම් කාර්ය මණ්ඩලය ක්ෂණිකව වායූසමීකරණ පද්ධතිය ක්‍රියා විරහිත කිරීමට කටයුතු කළ අතර  ස්වර්ණභූමි ගුවන්තොටුපළ වෙත ඉක්මනින් ගොඩබැස්සවීමට ඉල්ලා ඇත.

ඒ අනුව ගුවන් යානාව ආරක්ෂිතව ගොඩබැස්සවීමෙන් පසු  ගුවන් නියමුවන් විසින් ගුවන් මගීන් නිරුපද්‍රිතව ගුවන් යානාවෙන් පිටත් කිරීම උදෙසා  ආරක්ෂිත පඩිපෙළක් ආධාරයෙන් ඔවුන් ගුවන් යානායෙන් ඉවත් කිරීමට කටයුතු කර ඇත.

පසුව ස්වර්ණභූමී ගුවන් තොටුපළේ සිටින ගුවන් යානා ඉංජිනේරුවන් මගින් ගුවන් යානාවේ වායුසමීකරණ පද්ධතියේ ඇතිවූ දෝෂයක් බව  හඳුනාගත් අතර දැඩි පරීක්ෂාවකින් පසු පියාසර කිරීම සඳහා සුදුසු බවට සහතික කරනු ලැබ තිබේ. ඒ අනුව  මගීන් 235ක් රැගත් UL891  ගුවන් යානය නැවත වරක්  බැංකොක් සිට අද දින (සිකුරාදා)  පැය 0337ට  පියාසර කර ඇත. එම ගුවන් යානය බණ්ඩාරනායක ජාත්‍යන්තර ගුවන් තොටුපළ වෙත පැය 0525 ට ගොඩබස්සවා ඇත. අනෙකුත් මගීන් 30 දෙනෙකු UL403 දරණ ගුවන් යානය වෙත යොමු කළ අතර අද දින ඔවුන් කොළඹ වෙත පැය 1100 පැමිණ තිබේ.

ශ්‍රීලංකන් ගුවන් සමාගම අවධාරණයෙන් ප්‍රකාශ කර සිටින්නේ ගුවන් සමාගම නිරතුරුවම ගුවන් මගීන් ඇතුළු එහි කාර්ය මණ්ඩලය සහ ගුවන් යානාවේ ආරක්ෂාව පිළිබද ඉමහත් අවධානයෙන් කටයුතු කරන බවත් ඒ සඳහා අන්තර්ජාතිකව පිළිගත් ආරක්ෂක විධිවිධාන ඉතා උසස් අන්දමින් පිළිපදින බවත් ය.