SI 3029ක් IP දක්වා උසස්වෙති

‍ෙඋප පොලිස් පරීක්ෂක සේවයේ කටයුතු කරන නිලධාරීන් 3029 දෙනෙකු පොලිස් පරීක්ෂකවරුන් ලෙස උසස් කිරීමට නීතිය සාමය හා දක්ෂිණ සංවර්ධන අමාත්‍ය සාගල රත්නායක මහතා කටයුතු කර ඇත.

ඒ අනුව පොලිස් පරීක්ෂක සේවයේ දැනුට අනුමත නිලධාරී සංඛ්‍යාව වන නිලධාරීන් 2699 ක ප්‍රමාණය සම්පූර්ණ කිරීමට අවශ්‍ය නිලධාරීන් 603 දෙනෙකුගේ  පුරප්පාඩු මේ මඟින් සැපිරෙනු ඇත.

එසේම මේ වන විට උප පොලිස් පරීක්ෂක සේවයේ වසර 08 ක සේවය කාලය සම්පූර්ණ කරනු ලැබූ නිලධාරීන් 2426 ප්‍රමාණයක් ද අධි සේවක පදනම මත පොලිස් පරීක්ෂක සේවයට උසස් වීම් ලබා දෙනු ඇත.

එසේම මේ වන විට අවුරුදු 08 ක කාලයක් කාන්තා උප පොලිස් පරීක්ෂක සේවයේ කටයුතු කළ නිලධාරීනින් 320 දෙනෙකුටද කාන්තා පොලිස් පරීක්ෂකවරියන් ලෙස උසස්වීම් හිමි වෙයි.

මීට අදාළ යෝජනාව අමාත්‍යවරයා විසින් හෙට (07) දින ජාතික පොලිස් කොමිසමට ඉදිරිපත් කිරීමට නියමිතය. මේ සඳහා අවශ්‍ය නම් කැබිනට් අනුමතයක් සඳහා යොමුකිරීමට ද අවශ්‍ය පියවර මේ වන විට සූදානම් කර ඇත.

එසේම දැනට ජ්‍යෙෂ්‍ඨ පොලිස් අධිකාරී, පොලිස් අධිකාරී සහ සහකාර පොලිස් අධිකාරී තනතුරුවල සේවයේ පවතින පුරප්පාඩු පිරවීමටද අවශ්‍ය පියවර ගනු ඇත.

දැනට පවතින ක්‍රමවේදය අනුව සහකාර පොලිස් අධිකාරීවරයෙකු නියෝජ්‍ය පොලිස්පතිවරයෙකු දක්වා උසස් වීම් ලැබීමට සහකාර පොලිස් අධිකාරී. පොලිස් අධිකාරී සහ ජ්‍යෙෂ්‍ඨ පොලිස් අධිකාරී තනතුරුවල වසර 18 ක සේවා කාලයක් සම්පූර්ණ කළ යුතුව තිබුණද එය වසර 17 ක් දක්වා අඩු කිරීමට කටයුතු කරනු ඇත.