KP ට එරෙහි JVP පෙත්සම ඉවතට

කොටි සංවිධානයේ ප්‍රධාන අවි ආයුධ සැපයුම්කරු සහ ජාත්‍යන්තර අංශයේ නායකයාව සිටි කුමරන් පද්මනාදන් හෙවත් කේ.පී. නමැත්තා වහාම අත්අඩංගුවට ගෙන ඔහුට එරෙහිව නඩු පැවරීමට නියම කරන්නැයි ඉල්ලමින් ජනතා විමුක්ති පෙරමුණේ පාර්ලිමේන්තු මන්ත්‍රී විජිත හේරත් මහතා ගොනු කළ පෙත්සම අභියාචනාධිකරණය අද (04දා) නිශ්ප්‍රභ කළේය.

මෙම පෙත්සම විභාගයට ගැනීමට පදනමක් නොමැති බව සඳහන් කරමින් අභියාචනාධිකරණය අදාළ පෙත්සම නිශ්ප්‍රභ කළේය.

මෙම පෙත්සම ඇල්.ටී.බී. දෙහිදෙණිය සහ ශිරාන් ගුණරත්න යන මහත්වරුන්ගෙන් සමන්විත අභියාචනාධිකරණ විනිසුරු මඬුල්ලක් හමුවේ සලකා බැලිණි.

කොටි සංවිධානයේ ප්‍රධාන අවිආයුධ සැපයුම්කරු සහ ජාත්‍යන්තර අංශයේ නායකයා වන කුමරන් පද්මනාදන් හෙවත් කේ.පී. නමැත්තා එල්.ටී.ටී.ඊ. සංවිධානය සිදු කළ අපරාධ රැසකට වගකිවයුතු බව සිය පෙත්සමේ සඳහන් කරන පෙත්සම්කාර විජිත හේරත් මහතා ඔහු ඉන්දීය අගමැති රජිව් ගාන්ධි ඝාතනයටද වගකිවයුතු බව සඳහන් කොට ඇත.