ජනපතිට ඇති ශක්තිය හීනවීමක් නෑ

ජාතික හෙළ උරුමය ආණ්ඩුවෙන් ඉවත්වුවද ඉදිරි ජනාධිපතිවරණයේදී ජනාධිපති මහින්ද රාජපක්ෂ මහතා වටා තිබෙන ශක්තියෙහි කිසිදු හීනවීමක් සිදුනොවන බවත්, එක්සත් ජනතා නිදහස් සන්ධානය තව පක්ෂ කිහිපයකින් පෝෂණය වන බවත් විදේශ කටයුතු අමාත්‍ය මහාචාර්ය ජී.එල්. පීරිස් මහතා සඳහන් කළේය.
ඊයේ (18දා) පැවැති මාධ්‍ය සාකච්ඡාවකදී මේ බව සඳහන් කළ අමාත්‍යවරයා වැඩිදුරටත් සඳහන් කළේ ජාතික හෙළ උරුමය විසින් ශ්‍රී ලංකා නිදහස් පක්ෂය වෙත ඉදිරිපත් කළ යෝජනා 35 කිසිවිටෙකත් ප්‍රතික්‍ෂේප කර නොමැති බවයි.

එහෙත් අදාළ යෝජනා මාලාව පිළිබඳව දීර්ඝ වශයෙන් සාකච්ඡා කළ යුතු බවත්, එයට හේතු වී තිබෙන්නේ ආණ්ඩුක්‍රම ව්‍යවස්ථාව, විධායක ජනාධිපති ක්‍රමය ආදිය වෙනස් කිරීම ඉතාමත් සංකීර්ණ කටයුත්තක් නිසා බවත් අමාත්‍යවරයා කියා සිටියේය.

ඉදිරිපත් කර තිබෙන යෝජනා බොහෝමයක් රටට ඉතාමත් වැදගත් කරුණු බවත්, එහෙත් ඒවා සිදුකිරීමට යම් කාලයක් අවශ්‍ය බවත් ඔහු සඳහන් කළේය.
ආණ්ඩුව සමග සිටින ඕනෑම පක්ෂයකට ඉවත්ව යෑමට හැකි බවත්, එය ප්‍රජාතන්ත්‍රවාදී ක්‍රියාවක් බවත් අමාත්‍යවරයා කියා සිටියේය.

ආණ්ඩුවෙන් පක්ෂයක් ඉවත්වුවද, එය ඉදිරි ජනාධිපතිවරණයේදී ජනාධිපති මහින්ද රාජපක්ෂ මහතාගේ ජයග්‍රහණය හීනවන කාරණයක් නොවන බවත්, එයට හේතු වී තිබෙන්නේ යුද්ධය නිමාකර, රටට සාමය උදාකර රට සංවර්ධනය කරන නායකයා වටා රටේ ජනතාව පෙළගැසී සිටින නිසා බවත් හෙතෙම සඳහන් කළේය.