සියලු පොලිස් දඩ SMS මගින් ගෙවීමේ ක්‍රමයක්

ක්‍රෙඩිට් කාඩ්වලින් දඩ ගෙවීම ලබන වසරේදී

සියලුම පොලිස් දඩ එස්.එම්.එස්. මාර්ගයෙන් ගෙවීමේ ක්ෂණික ක්‍රමයක් මේ වසර තුළදී හඳුන්වාදෙන බව පොලිස් මූලස්ථානය සඳහන් කරයි. 
මීට අමතරව ලබන වසර තුළදී පොලිස් දඩ ගෙවීම සඳහා ක්‍රෙඩිට් කාඩ්පත භාවිත කිරීමට අවශ්‍ය සැලසුම්ද මේ වනවිට සකස්වෙමින් තිබෙන බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතිඥ අජිත් රෝහණ මහතා සඳහන් කළේය. 
රට තුළ ක්‍රියාත්මක වන ඕනෑම ජංගම දුරකථන ජාලයක් හරහා මෙම ගෙවීම් සිදුකළ හැකි බවත්, ඊට අදාළ ක්‍රමවේදයන් මොරටුව ආතර් සී. ක්ලාක් මධ්‍යස්ථානය විසින් මේ වනවිට සකස් කර අවසන් බවද ඔහු පවසා සිටියේය.
ලබන වසර තුළදී ක්‍රෙඩිට් කාඩ්පත මගින් දඩ කොළ ගෙවීමේ ක්‍රමය හඳුන්වාදෙන බවත්, ක්‍රෙඩිට් කාඩ්පත මගින් දඩ කොළ ගෙවීමට අවශ්‍ය උපකරණ රථවාහන රාජකාරිවල නිරතවන පොලිස් නිලධාරීන්ට ලබාදෙන බවත් මාධ්‍ය ප්‍රකාශකවරයා සඳහන් කළේය.
රියදුරන්ට මෙවැනි ක්‍රමවේද හඳුන්වා දෙන්නේ තැපැල් කාර්යාලවලට දඩකොළ ගෙවීමේදී සිදුවන අපහසුතා සහ තම පදිංචි ප්‍ර‘දේශයට දුර ප්‍ර‘දේශයකදී දඩ කොළයක් ලැබෙන රියදුරුට එම මුදල ගෙවීමට තැපැල් කාර්යාලයක් විවෘතව නොපැවතියහොත් ඉන් සිදුවන අපහසුතා සැලකිල්ලට ගැනීමෙන් බවද ඒ මහතා පවසා සිටියේය.
එස්.එම්.එස්. ක්‍රමය සහ ක්‍රෙඩිට් කාඩ්පත් ක්‍රමය හඳුන්වා දුන්නද තැපැල් කන්තෝරුවට දඩ කොළ ගෙවීමේ ක්‍රමය එලෙසම පවතින බවද මාධ්‍ය ප්‍රකාශකවරයා වැඩිදුරටත් සඳහන් කළේය.