සිතුල්පව්ව කැණීමෙන් ආවාස ගෘහයක නටබුන් මතු වේ

සිතුල්පව්ව ආරාම සංකීර්ණයේ 'අයිමර' නම් ලෙන අසල පිහිටි ක්‍රිස්තු වර්ෂ පළමුවැනි හා දෙවැනි සියවසට පමණ අයත්විය හැකි බවට විශ්වාස කෙරෙන ඉදිකිරීම් ලක්‍ෂණ සහිත නටබුන් ගොඩනැගිල්ලක් පාදාගෙන ඇත.

දැනට අනාවරණය වී ඇති සාධකවලට අනුව මෙය මහල් කිහිපයකින් යුත් ආවාස ගෘහයක් විය හැකි බව කැණීම් ව්‍යාපෘතියේ ස්ථානභාර නිලධාරී පුරාවිද්‍යා පර්යේෂණ සහකාර බුද්ධි නාගොඩවිතාන මහතා පවසයි. එසේම මීටර් 13.5 ක් දිගින් හා මීටර් 11 ක් පළලින් යුත් මෙම ගොඩනැගිල්ල සිතුල්පව්ව ආරාම සංකීර්ණයට අයත් පැරණි ගොඩනැගිලි අතරින් එකක් බවද ඒ මහතා පැවසීය.

මීට අමතරව රන් ආලේපිත මැටි බඳුන් කැබලි, විවිධ වර්ණයන්ගෙන් යුත් මැටි බඳුන් කැබලි, පැරණි පෙති උළු, පැරණි කාසි හා පැරණි යකඩ ඇණ ආදියද මෙම ගොඩනැගිල්ල පාදාගැනීමේ කටයුතු අතරතුරදී අනාවරණය කරගෙන ඇත. රන් ආලේපිත මැටිබඳුන් ලංකාවෙන් හමු වී ඇති ප‍්‍රථම අවස්ථාව මෙයයි. කැණීම් කටයුතු අවසන් වූ වහාම මෙම ගොඩනැගිල්ල සංරක්‍ෂණය කිරීමටද නියමිතය.