සංශෝධනේ කියලා එකම කාඩ් පැක් එක අනනවා විතරයි - MR

කැබිනට් සංශෝධනයෙන් කිසිදු වෙනසක් සිදු නොවුණු බවත්, වෙනත් කාඩ්පැක් නොමැති බැවින් එකම කාඩ්පැක් එක එහාට මෙහාට ඇනීම සිදුකරන අතර, එය කිසිදු තේරුමක් නොමැති කටයුත්තක් බවත් හිටපු ජනාධිපති මහින්ද රාජපක්ෂ මහතා ගැටඹේදී පැවසීය.

හෙතෙම මේ බව පැවසුවේ අද (25දා) ගැටඹේ රාජෝපවනාරාම විහාරාධිපති කැප්පෙටියාගොඩ සිරිවිමල හිමියන් බැහැදැකීම සඳහා ගැටඹේ රාජෝපවනාරාම විහාරාධිපති කැප්පෙටියාගොඩ සිරිවිමල හිමියන් බැහැදුටු අවස්ථාවේදී මාධ්‍යවේදියෙකු නැගූ පැනයට පිළිතුරු දෙමිනි.

ගැටඹේ රාජපෝවනාරාම විහාරාධිපති කැප්පටියාගොඩ සිරිවිමල නාහිමියෝ එහිදී මහින්ද රාජපක්ෂ මහතාට මෙසේ පැවැසූහ.

''අද රට දිහා බලපුවාම රටට නායකත්වයක් නැහැ. රටම අද අරාජික වෙලා. ජනාධිපතිතුමාට වැඩක් කරන්න දෙන්නෙ නැහැ අනිත් මිනිස්සු. වැඩක් කරන මිනිහව කපලා දාලා ජනාධිපතිතුමාට උපදෙස් දෙන්නෙ ඒ මනුස්සයාව විනාශ වෙන්න. දැන් අන්තිම භයානක තත්ත්වයක් රටේ තියෙන්නෙ.''  

එහිදී අදහස් දැක්වූ මහින්ද රාජපක්ෂ මහතා,

''කැබිනට් සංශෝධනය කියා කිසි වෙනසක් නෑ. වෙන කාඩ් පැක් නොමැති නිසා එකම කාඩ් පැක් එක එහාට මෙහාට අනනවා විතරයි. ඒක කිසිම තේරුමක් නැති වැඩක්. පළාත් පාලන ආයතනවල බලය පිහිටුවීම සඳහා ඔවුන්ට නිදහසේ කටයුතු කිරීමට අවස්ථාව දීලා තියෙනවා. ජනාධිපතිවරයාද ඒ සම්බන්ධව විරුද්ධ වේ යැයි මං නොසිතනවා'' යැයි පවසා සිටියේය.

ආණ්ඩු බලය හා විධායකයේ බලය පාවිච්චි කරමින් ජනතාව දුන් බලය බලයෙන් වත්මන් රජය තියාගෙන සිටින බවද හෙතෙම පැවසීය.