විපක්ෂය සැඟවුණු අමුත්තා හොයනවා- දයාසිරි

විපක්ෂය සැඟවුණු අමුත්තා හොයනවා වගේ පොදු අපේක්ෂකයා හොය හොයා සිටින  බව වයඹ ප්‍රධාන අමාත්‍ය දයාසිරි ජයසේකර මහතා සඳහන් කරයි.

එසේම සපත්තුවේ පාට, කමිසයේ පාට අසමින් සැඟවුණු අමුත්තා හොයනවා මෙන් දේශපාලඥයෝ පස්සෙ ඇවිදිමින් දාගන්න කෙනෙක් නැතුව වටේ යනවා යැයිද හෙතෙම සඳහන් කළේය.

කුලියාපිටිය ආසනයේ නැගෙනහිර සහ බටහිර ප්‍රාදේශීය ලේකම් කොට්ඨාසවල  පැවති ගොවීන් 12000 කට බිත්තර වී ලබාගැනීම වෙනුවෙන් කෝටි 3 ක මුදල් චෙක්පත් ලබාදීමේ උත්සවවලට ඊයේ (18දා) එක්වෙමින් ප්‍රධාන ඇමතිවරයා මේ බව පැවසීය.

“අද විවිධ බලවේග ජනාධිපතිතුමාට විරුද්ධව නැගිටිනවා. මමත් විපක්ෂයේ ඉන්නකොට රනිල් මහත්තයත් එක්ක පාරට බැහැලා කඳුළු ගෑස් කාලා මගේ වාහනෙත් කුඩු කරගත්තා. එහෙම ගිහින් මේ ගමන යන්න  බෑ කියන එක මම තේරුම් ගත්තා. විශේෂයෙන් නායකයෙක් තුළ මනුස්සකම තිබිය යුතුයි. අද විපක්ෂය ජනාධිපතිවරණය වෙනුවෙන් පොදු අපේක්ෂකයෝ හොයනවා. අවුරුදු උත්සවයක සැඟවුණු අමුත්තා හොයනවා වගේ කමිසයේ පාට හොයමින්, සපත්තුවේ පාට හොයමින් ඔයාද පොදු අපේක්ෂකයා කියලා අසමින් දේශපාලඥයෝ පස්සෙ යනවා.”යනුවෙන්ද හෙතෙම සඳහන් කළේය.