විපක්ෂය සංගීත පුටු තරගයක - ජනපති

පොදු අපේක්ෂකයා කවුරුන්දැයි තෝරාගැනීමට නොහැකිව විපක්ෂ සන්ධානය ඒ සඳහා සංගීත පුටු තරගයක් පවත්වමින් සිටින බවද, අවසානයේදී විපක්ෂයේ ජනාධිපති අපේක්ෂකයා තෝරාදීමට පවා සිදුවන්නේ තමන්ට යැයිද ජනාධිපති මහින්ද රාජපක්ෂ මහතා පෙරේදා (15දා) කුරුණෑගලදී ප්‍රකාශ කළේය.

උතුරු අධිවේගී මාර්‍ගයේ කුරුණෑගල පිවිසුම කුරුණෑගල ගැට්ටුවානේදී විවෘත කිරීමේ අවස්ථාවට සහ වයඹ පළාතේ බිම්සවිය ඔප්පු හිමිකම්ලාභීන් 12,000 කට ඔප්පු ප්‍රදානය කිරීමට කුරුණෑගල මාලිගාපිටියේ සංවිධානය කර තිබූ උත්සවයට සහභාගීවෙමින් ජනාධිපතිවරයා මෙසේ පැවසීය.

එහිදී වැඩිදුරටත් අදහස් දැක්වූ ජනපතිවරයා මෙසේද පැවසීය

"මම ජනාධිපතිවරණයට සූදානම් වූයේ පසුගියවර ජනාධිපතිවරයා ලෙස පත්වූ දිනයේ සිටයි.  කලින්ම ජනාධිපතිවරණයක් පිළිබඳව ප්‍රකාශයට පත් කළේ විපක්ෂයට ඒ සඳහා සූදානම්වීමට කාලය ලබාදීමටයි. අපේ හාමුදුරු කෙනෙකුත් විපක්ෂයේ සංගීත පුටු තරගයට මියුසික් දාගෙන කැරකෙමින් සිටිනවා. එසේ කැරකෙන ගමන් ජනාධිපති අපේක්ෂක පුටුවේ වාඩිවීමට උත්සාහ ගන්නවා.  

අද විපක්ෂයේ ලොකුම ගැලවුම්කාරයා තමයි ඩයස් පෝරාව. මේ රටේ සිදුවන සුළු සුළු සිදුවීම් මහ ලොකු කරලා පිටරටවල්වලට පෙන්වන්න මේ අය හදනවා. අරාබි වසන්තය කියලා ඒ ඒ රටවල සිදුවන බිහිසුණු මනුෂ්‍ය ඝාතන ගැන මේ අය කතා කරන්නේ නෑ. ඒවා ගැන අපේ රටේ ඉන්න මුස්ලිම් නායකයෝ නිහඬයි. යුද්ධයෙන් බැරිවුණු තැන දැන් හදනවා ජාතිබේද, ආගම්භේද, කුලභේද ගෙනැල්ලා සාමයෙන් ඉන්න ජනතාව අවුස්සන්න." යැයි හෙතෙම සඳහන් කළේය.