වායු දූෂණයෙන් වසරකට මිලියන 7ක් මරුට

වායු දූෂණය හේතුවෙන් ලෝකයට වසරකට අහිමි වන මිනිස්  සංඛ්‍යාව දසලක්ෂ 7ක් පමණ වන බවත් ලොව විශාලතම මිනිස් ඝාතකයා වායු දූෂණය බවත් නේපාලයේ ඉසිමොඩ් ආයතනයේ වායුගෝලීය විද්‍යාවන් පිළිබඳ විද්‍යාඥ අර්නිකෝ පාණ්ඩේ (Arnico K. Panday ) මහතා පැවසීය.

වායු දූෂණය හේතුවෙන් ඇතිවන අහිතකර බලපෑම් අතර මිනිස් ජීවිත විනාශය එකක් පමණික් බවත්  ඊට අමතරව තවත් සමාජීය සහ ආර්ථික ගැටලු රැසක් ඇතිවන බවත් හෙතෙම පැවසීය. ඉන් ප්‍රධානතම කරුණ දේශගුණ විපර්යාස බවන් හෙතෙම පැවසීය.

ඔහු මේ බව සඳහන් කළේ කොළඹ බණ්ඩාරනායක  ශාලාවේදී මේ දිනවල පැවැත්වෙන හිතකර වායු ගෝලයක් සඳහා වන ආසියානු ජාත්‍යයන්තර සම්මන්ත්‍රණයේ දී ය.

අර්නිකෝ පාණ්ඩේ (Arnico K. Panday ) මහතා පවසන්නේ කාබන්ඩයොක්සයිඩ් තරමටම වායුගෝලයට අහිතකර බලපෑමක් එල්ල කරන දූෂ්‍යකාරකයක් නම් කළු කාබන් අංශු (Black Carbon) බවයි.

පාණ්ඩේ මහතා වැඩිදුරටත් සඳහන් කළේ  වායු දූෂණය එක් රටකට පමණක් තනිව නැවැත්විය නොහැකියි. ඒ සඳහා අන්තර් ජාතික සහයෝගීතාවක් නිතැතින් අවශ්‍යයි. වායු දූෂක එක දේශසීමාවක සිට වෙනත් දේශ සීමාවකට පහසුවෙන් ඇදීයනවා* යනුවෙනි.