ලංගම බස් රථ 1750 ක් ධාවනයට

දුම්රිය රියදුරන් සහ දුම්රිය සේවක ඒකාබද්ධ සංධානය විසින් ආරම්භ කරන ලද වර්ජනය හේතුවෙන් මහජනතාවට ඇති වී තිබෙන ගමනාගමන අපහසුතා අවම කිරීමට අමතර ලංගම  බස් රථ 1750 ක් මේ වනවිට යොදවා ඇතැයි ශ්‍රී ලංකා ගමනාගමන මණ්ඩලය පවසයි.

පාසල් නිවාඩුව හේතුවෙන් පාසල් සේවා සඳහා යොදවා තිබූ බස්රථ 750 ක් දුරගමන් සේවා සඳහා ද,  සුඛෝපභෝගී බස්රථ 60 ක් ද මෙම බස් රථ සංඛාවට ඇතුළත් බව ලංකා ගමනා ගමන මණ්ඩලයේ සභාපති රමාල් සිරිවර්ධන මහතා සඳහන් කරයි. 

දුම්රිය වාර ප්‍රවේශපත්‍ර හිමිකම් තිබෙන පුද්ගලයන්ට  සහ කලින් දුම්රිය ආසන වෙන්කරවා ගත් මගීන්ට කිසිදු ගාස්තුවක් ගෙවීමකින් තොරව මෙම බස්රථවල ගමන් පහසුකම් ලබාගැනීමට අවසරය ලබාදී ඇති බවද සභාපතිවරයා පැවසීය.

මේ පිළිබඳව සියලුම ඩිපෝ අධිකාරිවරුන් විශේෂ චක්‍රලේඛයක් මගින් දැනුවත් ඇති බවත්, යම් හෙයකින් එම ප්‍රවේශපත්‍ර මගින් ගමන් පහසුකම් ලබා ගැනීමට නොහැකි යැයි පවසන ඕනෑම කොන්දොස්තරවරයකුට විරුද්ධව විනයානුකූලව ක්‍රියා කරන බවත් ඒ මහතා පැවසීය.

හෙට (12දා) සිට  ආරම්භ වන අ.පො.ස. සා/පෙළ විභාගයට පෙනී සිටින දරුවන්ට දුම්රිය වාර ප්‍රවේශ පත්‍රය පෙන්වා පුද්ගලික බස්රථවලින් ගමන් කිරීමට අවස්ථාව ලබාදිය යුතුයැයි  ජාතික ගමනා ගමන කොමිසම විසින් සියලුම පුද්ගලික බස්රථ ධාවන සංගම්වලට දන්වා තිබේ.

මේ අතර අද පෙරවරු 10.00 වනවිට දුම්රිය ගමන්වාර 16 ක් ක්‍රියාත්මක වූ බව දුම්රිය දෙපාර්තමේන්තුව පවසයි. අද දහවල් 12.00 ට පෙර වර්ජනයේ නියැලෙන වෘත්තීය සංගම් සාමාජිකයන් හට සේවා කටයුතු සඳහා වාර්තා කරන ලෙස ප්‍රවාහන අමාත්‍යාංශය ඉල්ලීමක් කරයි.