ශ්රී ලංකාවේ රැඳී සිටි රෙහින්ග්යා සරණාගතයින් පිළිබඳව රජය සත්ය ප්රකාශ කළේ නම් ගල්කිස්සේදී පසුගියදා ඇතිවූ සිදුවීම ඇති නොවීමට ඉඩ තිබුණ බව පාර්ලිමේන්තු මන්ත්රී නමල් රාජපක්ෂ මහතා කියයි.
සතිපතා අද පුවත්පත වෙනුවෙන් ඔහු සම්පාදනය කරන කුරහන් සුවඳ තීරු ලිපියේ මේ බව දැක්වෙයි. සරණාගතයින් ශ්රී ලංකාවේ නොමැති බවට මුලිම් වයඹ සංවර්ධන හා අභ්යන්තර කටයුතු අමාත්යාංශයත්, පසුව අමාත්ය පාඨලී චම්පික රණවක මහතාත් පැවැසූ බව ඔහු පවසයි.
එවැනි තත්ත්වයක් තිබියදී ගල්කිස්ස ප්රදේශයේ ගොඩනගැල්ලක සිටියදී සරණාගතයින් හමුවූ බවත් රජය ඇත්ත වසන් කිරීම හේතුවෙන් ගල්කිස්සේදී උණුසුම් තත්ත්වයක් ඇති වූ බවත් ඔහු පවසයි.
උපුටා ගැනීම
"මේ වනවිට රෝහින්ග්යා සරණාගතයන් පිළිබඳ රටේ දැඩි මතයක් නිර්මාණය වී තිබේ. රෝහින්ග්යා සරණාගතයන් ශ්රී ලංකාවට පැමිණියා හෝ නැතාහෝ මෙතන ඇති ගැටලුව නම් ආණ්ඩුව රටේ ජනතාවට අසත්ය ප්රකාශ කිරීමයි. ඒ සම්බන්ධයෙන් විෂයභාර වයඹ සංවර්ධන හා අභ්යන්තර කටයුතු අමාත්යාංශය නිවේදනයක් නිකුත් කරමින් පැවසුවේ, වරින් වර පැමිණි සියලු රෝහින්ග්යාසරණාගතයන් දිවයිනෙන් පිටත් කර හැරීමට කටයුතු කළ බවයි.
ඉන්පසුව බස්නාහිර සංවර්ධන හා මහා නගර සංවර්ධන අමාත්ය පාඨලී චම්පික රණවක මහතාද සිය ෆේස්බුක් ගිණුම හරහා ප්රකාශයක් කරමින් පැවසුවේ කිසිදුරෝහින්ග්යා සරණාගතයෙකු ශ්රී ලංකාවේ නොමැති බවයි. නමුත් ඒ ප්රකාශවල උණුසුම පහව යන්නටත් මත්තෙන් ගල්කිස්සේ රඳවා සිටි රෝහින්ග්යා සරණාගතයන් 31 දෙනෙකු පිළිබඳ තොරතුරු අනාවරණය විය.
යම් හෙයකින් රජය මෙම සරණාගතයන් 31 දෙනා පිළිබඳ සත්ය තොරතුරු ජනතාවට පවසා තිබුණානම් එදා ගල්කිස්සේ සිදුවූ සිදුවීම නොවන්නට ඉඩ තිබිණි. රෝහින්ග්යා සරණාගතයන් පිළිබඳ සත්ය තොරතුරු වසන් කිරීමත්, ඔස්ට්රේලියාවට යන නැවකින් ඔවුන් ශ්රී ලංකාවට ගෙනඒමත් ආණ්ඩුව සිදුකළ දැවැන්ත කුමන්ත්රණයක කොටසක් ලෙස හැඳින්විය හැක."