මෙරට අත්අඩංගුවේ සිටී ඉන්දීය ධීවරයන් 77කට නිදහස

ශ්‍රී ලංකාවට අයත් මුහුදු සීමාව තුළට අනවසරයෙන් ඇතුළු වී නීති විරෝධී ලෙස ධීවර කටයුතුවල නියැළීම හේතුවෙන් අත්අඩංගුවට පත්ව සිටි ඉන්දීය ධීවරයන් 77 දෙනෙකු යළි එරටට භාර දීම ඊයේ (03දා) ශ්‍රී ලංකා නාවික හමුදාවේ සහාය ඇතිව සිදුකෙරිණි.

මෙම ධීවරයින් අවස්ථා කිහිපයකදී ශ්‍රී ලංකා නාවික හමුදාවේ සහ වෙරළාරක්ෂක දෙපාර්තමේන්තුවේ අත්අඩංගුවට පත් වූ අය වන අතර, ඔවුන් ශ්‍රී ලංකාවට අයත් මුහුදු සීමාවට අනවසරයෙන් ඇතුළුවී පතුල මත ඇදගෙන යාමේ (Bottom trawling) තහනම් ක්‍රමය භාවිතා කරමින් මසුන් ඇල්ලීමේ නිරතව සිට ඇත. එම ක්‍රමය ඉතා විනාශකාරී මසුන් ඇල්ලීමේ ක්‍රමයක් ලෙස හැඳින්විය හැක.  

එම ධීවරයන් අද සන්ධ්‍යාවේ කන්කසන්තුරයට උතුරින් වූ අන්තර්ජාතික මුහුදු සීමාවේදී ඉන්දීය වෙරළාරක්ෂක බළකායේ ‘සාරන්ග්’ නෞකාව වෙත භාර දීමට කටයුතු කෙරිණි.