මුහුදු නයි හමුවීම ගැන නාරා පරීක්ෂණයක්

මඩකලපුව මුහුදු තීරයේදී ධීවර දැල්වලට මුහුදු සර්පයන් (Sea Snakes) බහුලව හසුවීමට නිශ්චිත හේතුව අනාවරණය කරගැනීම සඳහා කඩිනමින් පරීක්ෂණයක් පවත්වන ලෙසට ධීවර හා ජලජ සම්පත් සංවර්ධන අමාත්‍ය මහින්ද අමරවීර මහතා විසින් නාරා ආයතනය වෙත උපදෙස් ලබා දී තිබේ.

මේ සම්බන්ධයෙන් 'අද' කළ විමසීමේදී ධීවර හා ජලජ සම්පත් සංවර්ධන අමාත්‍යාංශය පෙන්වා දුන්නේ ඉකුත් වර්ෂ කිහිපයකදී මෙන්ම පසුගිය වර්ෂයේදීද මෙම කාලයට සමගාමීව අදාළ මුහුදු තීරයන්හිදී මුහුදු සර්පයන් දැල්වලට හසුව තිබූ නමුත් මෙම වර්ෂයේදී ඊට සාපේක්ෂව බහුලව හසුව ඇති බවයි.

2004 වර්ෂයේ සුනාමි ව්‍යසනයට පෙරද මුහුදු සර්පයන් ධීවර දැල්වලට හසුව ඇති බවත්, ඒ අනුව මෙම තත්ත්වය ස්වාභාවික ව්‍යසනයක පෙර නිමිත්තක් ලෙස දක්වමින් මහජනතාව කැළඹී ඇතැයි වාර්තා වන බවත්, එහෙත් ස්වාභාවික ව්‍යසනයන්ගෙන් තොරවද මීට පෙර මුහුදු සර්පයන් හසුව ඇති බවත් අමාත්‍යාංශය පෙන්වා දෙයි.

කෙසේ වුවද පෙර අවස්ථාවන්ට සාපේක්ෂව මෙම වසරේදී බහුලව මුහුදු සර්පයන් හසුවීම මූලික කරගනිමින් ඊට නිශ්චිත හේතුව හඳුනාගැනීම සඳහා කරුණු 05ක් මූලික කරගනිමින් පරීක්ෂණයක් පැවැත්වීමට තීරණය කර ඇති බව පැවසේ.

ඒ අනුව මෙම සර්පයන් විශාල වශයෙන් හසුවීම ස්වභාවික ව්‍යසනයක පෙර නිමිත්තක් වන්නේද, අදාළ සර්පයන්ගේ ජීවන චක්‍රයේ වෙනස් වීමක් හේතුවෙන් සිදු වූවක්ද, නොමැතිනම් ඔවුන්ගේ චර්යා රටාවේ ස්වභාවයක්ද, ඊසානදිග මෝසම් තත්ත්වය සමගින් මුහුදේ ඇතිවන කැළඹිලි තත්ත්වය හේතුවෙන් වූවක්ද හෝ සාගර ලවණ තත්ත්වය හා උෂ්ණත්වයේ වෙනස් වීමක් හේතුවෙන් සිදුවූවක්ද යන්න පිළිබඳ එම පරීක්ෂණය මගින් මූලිකව අධ්‍යයනය කෙරෙනු ඇති බවද අමාත්‍යාංශය වැඩිදුරටත් පවසා සිටියි.