මිලි මීටර් 150 ඉක්මවූ වැසි

දිවයින ආසන්නයේ ඊසාන දෙසින් වායුගෝලයේ පවතින කැළඹිලි තත්ත්වය හේතුවෙන්, උතුරු, උතුරු-මැද, නැගෙනහිර සහ ඌව පළාත්වල සමහර ස්ථානවලට ඉතා තද වැසි (මිලී මීටර් 150 කට වඩා)  ද සමග දිවයින පුරා වැසි හෝ ගිගුරුම් සහිත වැසි ඉදිරි පැය 24 පුරා පැතිර යා හැකි බව කාලගුණ විද්‍යා දෙපාර්තමේන්තුව කියයි.  

දිවයිනට නැගෙනහිර දෙසින් බෙංගාල බොක්ක ප්‍රදේශයේ පවතින ක්‍රියාකාරී වලාකුළු පද්ධතිය හේතුවෙන් යාපනයේ සිට ත්‍රිකුණාමලය සහ මඩකළපුව හරහා ගාල්ල දක්වා වන  මුහුදු ප්‍රදේශවල ක්ෂණිකව සුළං වේගය ඉහළ යාමට ඉඩ  ඇති  අතර එවිට එම මුහුදු ප්‍රදේශ ක්ෂණිකව රළු වීමට වැඩි හැකියාවක් පවතින බව කාලගුණ විද්‍යා දෙපාර්තමේන්තුව මධ්‍යහ්න 12.00 නිකුත් කළ නිවේදනයේ වෙයි. එසේම  දිවයින වටා වන මුහුදු ප්‍රදේශවල වැසි හෝ ගිගුරුම් සහිත වැසි තවදුරටත් පැවැතිය හැකි බවත් එම නිවේදනයේ වැඩිදුරටත් සඳහන් වෙයි.