මාලක සිල්වා හෙට හඳුනාගැනීමේ පෙ‍ෙරට්ටුවකට

තවත් 06 දෙනෙකු අත්අඩංගුවට ගැනීමට සොයයි

රාත්‍රී සමාජ ශාලාවකදී විදේශීය යුවළකට සිදුකළ පහරදීම පිළිබඳව අත්අඩංගුවට ගෙන රක්ෂිත බන්ධනාගාරගත කර සිටින අමාත්‍ය මර්වින් සිල්වා මහතාගේ පුත් මාලක සිල්වා මහතා හෙට (04දා) හඳුනාගැනීමේ පෙරෙට්ටුවකට ඉදිරිපත් කරන බව පොලීසිය සඳහන් කරයි. 
මෙම පහරදීමට සම්බන්ධ බව කියන තවත් පුද්ගලයන් 06 දෙනෙකු අත්අඩංගුවට ගැනීමට පොලිස් පරීක්ෂණයක් සිදුකරන බව ද පොලිස් මූලස්ථානය සඳහන් කරයි 
පෙරේදා (01දා) අලුයම 1.00 ත් 3.00 අතර කාලය තුළදී රාත්‍රී සමාජ ශලාවක් තුළ නර්තනයේ යෙදී සිටියදී විදේහිකයෙකු විසින් මාලක සිල්වා මහතාට පහර දුන් බවට ඔහුගේ හිතවතෙකු විසින් බම්බලපිටිය පොලීසියට කළ පැමිණිල්ලකට අනුව සිදුකළ විමර්ශනයකට අනුව පහරදීමෙන් අසාධාරණයක් සිදුව තිබෙන්නේ විදේශීය යුවළට බවට තොරතුරු හෙළිවීම නිසා ඒ පිළිබඳව අධිකරණයට කරුණු දැක්වීමෙන් පසු පෙරේදා රාත්‍රී 9.00 පමණ මාලක සිල්වා පොලිස් අත්අඩංගුවට ගත් බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නීතිඥ අජිත් රෝහණ මහතා සඳහන් කළේය. 
විදේශීය ජාතික යුවළ සොයාගෙන පොලීසිය කටඋත්තරයක් ලබාගත් බවත්, එම කටඋත්තරයට අනුව මෙම අත්අඩංගුවට ගැනීම සිදුකළ බවද ඔහු පවසා  සිටියේය.
පහරදීම නිසා තුවාල ලත් මාලක සිල්වා මහතා කොළඹ පෞද්ගලික රෝහලක ප්‍රතිකාර ලබමින් සිටියදී මෙම අත්අඩංගුවට ගැනීම සිදුකළ බවත්, පසුව අධිකරණයට කරුණු වාර්තා කිරීමෙන් පසු ඔහු 4 වැනිදා දක්වා රක්ෂිත බන්ධනාගාරගත කළ බවත්, ඔහු බන්ධනාගාර නිලධාරීන්ගේ ආරක්ෂාව මත පෞද්ගලික රෝහලක ප්‍රතිකාර ලබාගන්නා බවත් මාධ්‍ය ප්‍රකාශකවරයා සඳහන් කළේය. 
මාලක සිල්වා මහතාගෙන් පහර කෑමට ලක්වූ විදේශීය ජාතිකයා මෙරටට කොන්ත්‍රාත් සමාගමක ඉංජිනේරුවරයෙකු ලෙස සේවය කරන බවත්, පහර කෑමට ලක්වූ  විදේශීය තරුණිය පහර කෑමට ලක් විදේශීය ජාතිකයාගේ පෙම්වතිය බවත්, ඇය මෙරටට පැමිණි තිබෙන්නේ දින හතරකට පෙරදී බවත් හෙතෙම පවසා සිටියේය. 
බන්ධනාගාරගත කර සිටින මාලක සිල්වා මහතා හතරවැනිදා හඳුනාගැනීමේ පෙරෙට්ටුවකට ඉදිරිපත් කරන බවද ඔහු සඳහන් කළේය. 
ඉතිරි පිරිස් අත්අඩංගුවට ගැනීමට කොළඹ අපරාධ පරීක්ෂණ කණ්ඩායම විශේෂ පරීක්ෂණයක් ආරම්භ කර තිබෙන බවත්,  මාලක සිල්වා මහතාගේ හිතවතෙකු විසින් සිදුකළ පැමිණිල්ල පිළිබඳවත් පොලීසිය මේ වනවිට විශේෂ පරීක්ෂණයක් ආරම්භ කර තිබෙන බවත් ඒ මහතා පවසා සිටියේය.