මහින්ද ජනපති කරනවාද නැද්ද යන්න තීරණය කරන්නේ ඡන්දදායකයෝ

ජනාධිපති මහින්ද රාජපක්ෂ මහතාට තෙවැනි වරට ජනාධිපතිවරණයකට ඉදිරිපත් විය හැකිද? නොහැකිද? කියා විපක්ෂයේ දේශපාලඥයන් ප්‍රශ්නයක් කරගත යුතු නැති බවත්, මහින්ද රාජපක්ෂ මහතා තුන්වැනි වරටත් ජනාධිපති කරනවාද නැද්ද යන්න තීරණය ගනු ලබන්නේ ඡන්දදායකයන් විසින් බවත් ජාතික භාෂා හා සමාජ ඒකාබද්ධතා අමාත්‍ය වාසුදේව නානායක්කාර මහතා සඳහන් කළේය.
 ඊයේ (13දා) පැවැති මාධ්‍ය සාකච්ඡාවකදී මේ බව සඳහන් කළ අමාත්‍යවරයා වැඩිදුරටත් පවසා සිටියේ නීතිමය වශයෙන් වසර 04ක මුර කාලයෙන් පසු ජනාධිපති මැතිවරණයක් පැවැත්වීමට හා තෙවන වරටත් ඉදිරිපත් වීමට මහින්ද රාජපක්ෂ මහතාට අවස්ථාව හිමිවී තිබෙන බවය.
මේ නිසා කිසිවෙකුත් ඒ පිළිබඳව ප්‍රශ්නයක් ඇතිකරගත යුතු නොමැති බවත්, ඉදිරි ජනාධිපතිවරණයේදීත් මහින්ද රාජපක්ෂ මහතා ජනාධිපති වූ පසු ශ්‍රී ලංකාව දේශපාලනික වශයෙන් ජාත්‍යන්තරයේදී විශාල ශක්තිමත්භාවයක් ලබන බවද පවසා සිටියේය.
රජය විසින් රට තුළ විශාල සංවර්ධනයක් සිදුකළත්, විපක්ෂය ඇතුළු ජාත්‍යන්තරයට එය නොපෙනෙන බවත්, එම සංවර්ධනයේ ප්‍රතිලාභ ජනතාව හොඳින් භුක්තිවිඳින බවද අමාත්‍යවරයා කියා සිටියේය.
මේ අනුව තෙවන වරටත් ජනාධිපතිවරයා ලෙස මහින්ද රාජපක්ෂ මහතා පත්වූ පසු ජාත්‍යන්තරයටත් මේ රට තුළ සිදුවී ඇති සංවර්ධනය කොතරම්ද යන්න තේරුම්ගත හැකි බවද සඳහන් කළේය.
ජනාධිපති මහින්ද රාජපක්ෂ මහතා මේ රට තුළ සිදුකර තිබෙනා සංවර්ධනය නිසා ඉදිරි ජනාධිපතිවරණවලදී මහින්ද රාජපක්ෂ මහතාගේ ආසන්නයටවත් පැමිණ තරග කිරීමට හැකි විපක්ෂයේ අපේක්ෂකයෙකු තව අවුරුදු ගණනකට බිහිනොවන බවද වාසුදේව නානායක්කාර මහතා පවසා සිටියේය.