බස් රථයක් ප්‍රපාතයකට පෙරලී 21කට තුවාල

පෞද්ගලික බස් රථයක් පෙරේදා  (13දා) රාත්‍රියේ වලපනේ- නුවරඑළිය ප්‍රධාන මාර්ගයේ, මහව්ව පතන ප්‍රදේශයේදී  අඩි 70ක් පමණ ප්‍රපාතයට පෙරළීමෙන් බස් රථයේ ගමන් ගත් මගීන් 21 දෙනෙක් තුවාල රෝහල් ගත කර ඇතැයි වලපනේ පොලීසිය පවසයි.

තුවාල ලැබූ 21 දෙනාගෙන් 15 දෙනෙක් වලපනේ ප්‍රාදේශීය රෝහල වෙත ඇතුළත් කිරීමෙන් අනතුරුව බරපතළ තත්ත්වයේ සිටි තුවාලකරුවන් 06 දෙනෙක් නුවරඑළිය මහ රෝහල වෙත ඇතුළත් කෙරිණි.

මිහින්තලේ, බෝගහයාය ප්‍රදේශයේ සිට කතරගම බලා වන්දනාකරුවන් පිරිසක් රැගෙන පැමිණි බස් රථයක් මෙසේ අනතුරට ලක්ව ඇති අතර,බස් රථයේ රියදුරුට නින්ද යෑම හේතුවෙන් මෙම අනතුර සිදුව ඇතැයි පරීක්ෂණවලදී අනාවරණය විය.

සිද්ධිය සම්බන්ධයෙන් වලපනේ පොලීසිය වැඩිදුර පරීක්ෂණ පවත්වයි.