පාකිස්තානු නාවික නිලධාරීන් ලංකා නාවික හමුදා මාණ්ඩලික ප්‍රධානී හමුවෙයි

සුහද සංචාරයක් සඳහා පසුගිය (12 දින) මෙරටට පැමිණි පාකිස්තානු නාවික හමුදාවට අයත් ‘සයිෆ්' සහ ‘නසර්' යන නෞකාවන්ගේ අණදෙන නිලධාරීන් වන කපිතාන් ශාහිඩ් ඉක්බාල් සහ කපිතාන් සඛීබ් ඉලියාස් යන නිලධාරීන් අද (13දා) මෙරට නාවික ප්‍රධානීන් හමුවූ බව නාවික හමුදා මාධ්‍ය අංශය සඳහන් කරයි.

ඒ අනුව නාවික හමුදා මූලස්ථානයේදී නාවික හමුදා මාණ්ඩලික ප්‍රධානී, රියර් අද්මිරාල් සිරිමෙවන් රණසිංහ මහතා හමුවී සාකච්ඡා කළ බව නාවික හමුදා මාධ්‍ය අංශය සඳහන් කරයි. 

එම අවස්ථාව සඳහා නෞකාවන්ගේ මෙහෙයුම් අණදෙන නිලධාරී, කොමදෝරු සාකා රේමන් මහතාද සහභාගිවී සිටියේය. එහිදී, ඔවුන් ද්විපාර්ශ්වීය වශයෙන් වැදගත් කරුණු රාශියක් පිළිබඳව සුහද කථාබහක නිරත වූ අතර, එම අවස්ථාව සනිටුහන් කරමින් සමරු තිළිණ හුවමාරුවක්ද සිදුකෙරිණි.