ප්‍රේමකීර්ති ඝාතකයා ඉන්නේ ඔබේ සෙවණේ

'ප්‍රේමකීර්ති ඝාතකයා ඉන්නේ ඔබේ සෙවණේ'යැයි ජනපතිට පවසා අපහාස කළාට හඩ්සන් සමරසිංහ ප්‍රේමකීර්ති බිරියගෙන් කෝටි 15ක වන්දියක් ඉල්ලයි

'ජනාධිපතිතුමනි, ප්‍රේමකීර්ති ඝාතකයා ඔබ සෙවණේ' යන ශීර්ෂය යටතේ පුවත්පත් දෙකක පළකළ මාධ්‍ය සාකච්ඡා මගින් තමාට කළ අපහාසයට රුපියල් කෝටි 15ක වන්දියක් ඝාතනයට ලක්වූ ප්‍රවීණ කලාකරු ප්‍රේමකීර්ති ද අල්විස් මහතාගේ බිරිඳගෙන් අයකර දෙන්නැයි ඉල්ලමින් ශ්‍රී ලංකා ගුවන් විදුලි සංස්ථාවේ සභාපති හඩ්සන් සමරසිංහ මහතා කොළඹ දිසා අධිකරණයේදී නඩු පැවරීය.

ප්‍රේමකීර්තිද අල්විස් 25 වැනි ගුණ සමරුම වෙනුවෙන් පසුගිය ජූලි 31 වැනිදා ශ්‍රී ලංකා ගුවන් විදුලි සංස්ථා පරිශ්‍රයේ පැවැති උත්සවයක අවස්ථාවේදී මේ බව ජනාධිපති මහින්ද රාජපක්ෂ මහතාටද වග උත්තරකාරිය පවසා ඇතැයි පෙත්සමේ සඳහන්වී ඇත.

ගුවන් විදුලි සංස්ථාවේ සභාපති හඩ්සන් සමරසිංහ මහතා විසින් පවරා ඇති මෙම නඩුවේ වග උත්තරකාරිය ලෙස සඳහන් කර ඇත්තේ ප්‍රවීණ මාධ්‍යවේදී ප්‍රේමකීර්ති ද අල්විස් මහතාගේ බිරිඳ වන නිර්මලා ද අල්විස් මහත්මියයි. 

නීතිඥ සුමේධ මහවන්නිආච්චි මහතා මගින් මෙම පෙත්සම ඉදිරිපත් කොට සිටින හඩ්සන් සමරසිංහ මහතා, ප්‍රේමකීර්ති ද අල්විස් 25 වැනි ගුණ සමරුම අවස්ථාවේදී සිදුවූ සිද්ධීන් පිළිබඳව ඉන්පසු පළවූ පුවත්පත් දෙකකට මාධ්‍ය සාකච්ඡා ලබාදී ඇතැයිද එම තොරතුරුවලට අනුව ප්‍රේමකීර්ති ද අල්විස් කලාකරුවා ඝාතනය කළේ මා බව හැඟවෙන තොරතුරු ඇතුළත් කොට ඇතැයිද පවසන පෙත්සම්කරු, ඉන් තමාට විශාල අපහාසයක් සිදුවී ඇතැයිද සඳහන් කර ඇත. 
මින් තමාට වූ අපහාසය වෙනුවෙන් රුපියල් කෝටි 15ක වන්දියක් වග උත්තරකාරියගෙන් අයකර දෙන ලෙස පෙත්සම්කරු ඉදිරිපත් කළ පෙත්සමේ වැඩිදුරටත් සඳහන් කර ඇත.