නෙවිල් ප්‍රනාන්දු රෝහල මහාචාර්ය කාලෝගෙන් වන්දි ඉල්ලයි

පූජ්‍ය මාදුළුවාවේ සෝභිත හිමි සහ මාලඹේ නෙවිල් ප්‍රනාන්දු රෝහල සම්බන්ධ කරමින් සිදුකළ ප්‍රකාශයක් නිසා සිය රෝහලේ කීර්තිනාමයට හානි සිදු වූ බවට ප්‍රකාශ කරමින් ශ්‍රී ලංකා වෛද්‍ය සභාවේ සභාපති මහාචාර්ය කාලෝ ෆොන්සේකා මහතාගෙන් රුපියල් මිලියන 500 ක වන්දි මුදලක් ඉල්ලා එන්තරවාසි යැවූ බව මාලඹේ නෙවිල් ප්‍රනාන්දු රෝහලේ සභාපති වෛද්‍ය නෙවිල් ප්‍රනාන්දු මහතා ඊයේ (17දා) පැවසීය.
අපවත් වී වදාළ පූජ්‍ය මාදුළුවාවේ සෝභිත හිමියන් නෙවිල් ප්‍රනාන්දු රෝහලට වැඩම කර විවේක ලබාගත් දින කිහිපයේදී නිව්මෝනියාව ඇතුළු රෝගී තත්ත්වයන් වර්ධනය වීම මත උන්වහන්සේට අසාධ්‍ය වී තිබුණු බවට කාලෝ ෆොන්සේකා මහතා මාධ්‍ය ඔස්සේ අසත්‍ය ප්‍රචාර සිදුකර තිබෙන බවත්, එම ප්‍රකාශ මගින් රෝහලේ කීර්ති නාමයට හානි වූ බවත් ඊට එරෙහිව එන්තරවාසි යවන්නැයි නීතිඥයන්ට දැනුම්දුන් බවත් ඒ මහතා කියා සිටියේය.
නෙවිල් ප්‍රනාන්දු රෝහලේ වැඩ සිටි දින කිහිපයේදී උන්වහන්සේට නිව්මෝනියා වැනි රෝගී තත්ත්වයන් ඇති නොවූ බවත්, කිසිදු ශල්‍යකර්මයක් සිදු නොකළ බවත් කී සභාතිවරයා ඒ සම්බන්ධව පරීක්ෂණයක් පවත්වන්නේ නම් රෝහල් දත්ත වාර්තා ලබාදීමට සූදානම් බවද කියා සිටියේය.
එම රෝහලේදී ඊයේ පැවැති විශේෂ ප්‍රවෘත්ති සාකච්ඡාවේදී ඒ මහතා වැඩිදුරටත් සඳහන් කළේ මෙවැනි පසුබිමක මහාචාර්ය කාලෝ ෆොන්සේකා මහතා කරුණු විකෘති කර අදහස් පළකිරීමෙන් නෙවිල් ප්‍රනාන්දු රෝහලේ කීර්තිනාමයට හානියක් සිදුකර ඇති බවයි.
සෝභිත හිමියන්ට වසර 20කට අධික කාලයක සිට ප්‍රතිකාර කරනු ලබන කායික රෝග පිළිබඳ වෛද්‍යවරයා නෙවිල් ප්‍රනාන්දු රෝහලේ සේවය කරන බැවින් උන්වහන්සේගේ කටයුතු සොයාබැලුවේ එම වෛද්‍යවරයා විසින් බවද සභාපතිවරයා කීය.
ක්ෂුද්‍රවේදී වෛද්‍යවරයෙකුගේ මූලිකත්වයෙන් විෂබීජ සම්බන්ධ ඒකකය මගින් පරීක්ෂා කිරීම් කටයුතු සිදුකළ බවත්, හෘද සැත්කමෙන් අනතුරුව සෙන්ට්‍රල් රෝහලේ වෛද්‍යවරුන් නියම කළ ඖෂධ පමණක් ලබාදුන් බවත් නෙවිල් ප්‍රනාන්දු මහතා ප්‍රකාශ කළේය.
සෝභිත හිමියන් නෙවිල් ප්‍රනාන්දු රෝහලට වැඩම කරවාගෙන පරීක්ෂා කරන්නැයි තමාට කිසිවෙකුගෙන් බලපෑමක් එල්ල නොවූ බවද ඔහු කීය.
වැඩිදුරටත් අදහස් දැක්වූ වෛද්‍ය නෙවිල් ප්‍රනාන්දු මහතා,
'සෝභිත හාමුදරුවෝ මම දැනගෙන හිටියේ අවුරුදු 30කට කලින් ඉඳලා. උන්වහන්සේගේ ප්‍රධාන දායකයෙක් මම. පසුගිය මැතිවරණයට පෙර පිටකොන්දේ අමාරුවක් නිසා මගේ රෝහලට ඇවිල්ලා සුමානයක් විතර හිටියා. මෙවර ශල්‍යකර්මය සිදුකළ සෙන්ට්‍රල් රෝහලේ උන්වහන්සේ වැඩ සිටියදී මං බලන්න ගියා. ඕන වෙලාවක මගේ රෝහලට ඇවිල්ලා විවේක ගන්න කියලා එහිදී ඉල්ලා සිටියදී ඒ ආරාධනය පිට දවස් 4-5 ක් මෙහේ රැඳී සිටියා. ඒ කාලසීමාවේ උන්වහන්සේට කිසිදු අසනීපයක් තිබුණෙ නැහැ. සෙන්ට්‍රල් රෝහලේ ශල්‍යකර්මය සිදුකළ වෛද්‍යවරයාගේ නිර්දේශ මතයි රැඳී සිටියේ. නිව්මෝනියාවක් හැදුණෙ නැහැ. අපේ රෝහලට ඇතුළු වනවිට හාමුදුරුවන්ගේ බර කිලෝග්‍රෑම් 79 යි. රෝහලෙන් පිටවෙද්දිත් කිලෝග්‍රෑම් 79 ක් තිබුණා. ඔක්තෝබර් 22 වැනිදා අපේ රෝහලින් හාමුදුරුවෝ එක්ක ගියේ ශල්‍යකර්මයේ තුවාල බලන්න ඕනේ කියලයි. ඒ යද්දි කිසි අසනීපයක් තිබුණෙ නෑ. සිංගප්පූරුවට ගිහින් තිබුණෙ නොවැම්බර් 03 වැනිදා. ඒ යන්න පැයකට කලින් අගමැතිවරයා සමග පැයක් කතා කර තිබුණා. උන්වහන්සේ ලංකාවෙන් අරන් ගිහින් තිබුණෙ සිහිය, බුද්ධිය හොඳට තිබියදී. මගදි අසනීප වෙන්න ඇති' යනුවෙන් හෙතෙම පවසා සිටියේය.
මාළඹේ පෞද්ගලික වෛද්‍ය විද්‍යාලයේ උපකුලපති මහාචාර්ය ආනන්ද සමරසේකර මහතා ඇතුළු නෙවිල් ප්‍රනාන්දු රෝහලේ අධ්‍යක්ෂවරුද මෙහිදී අදහස් පළකළහ.