ද්‍රෝහියා හා වීරයා ගැන රනිල් කියයි

බලයට පත්වූ දා සිට ජනතාව වෙනුවෙන් කිසිදු සේවයක් නොකර ඉදිරි ජනාධිපතිවරණය ජයගැනීමට මහින්ද රාජපක්ෂ ජනාධිපතිවරයා ද්‍රෝහියා සහ වීරයා තෝරාගන්නා කතාවක් ප්‍රචාරය කළද, යුද්ධය ජයගැනීමට දිවිහිමියෙන් කටයුතු කළ සරත් ෆොන්සේකා මහතාගේ ඡන්ද අයිතිය අහෝසි කිරීම සහ දළදා මාලිගාවට ප්‍රහාර එල්ල කළ, සංඝයා වහන්සේලා ඝාතනය කළ පුද්ගලයන්ට ඡන්ද අයිතිය දීම තුළින් ද්‍රෝහියා සහ වීරයා කවුද යන්න මේ වනවිට රටට හෙළි වී තිබෙන බව එක්සත් ජාතික පක්ෂ ජාතික නායක රනිල් වික්‍රමසිංහ මහතා සඳහන් කළේය.

ඉදිරි ජනාධිපතිවරණයේ බිම මට්ටමේ සංවිධාන කටයුතු සිදුකිරීම සඳහා ඡන්දපොළ මට්ටමින් පත්කළ සංවිධායකවරුන් 12,000කට පත්වීම් ලිපි ප්‍රදානය කිරීමේ අවස්ථාවට අද (28දා) කොළඹ හයිඩ් පිටියට එක්වෙමින් රනිල් වික්‍රමසිංහ මහතා මෙම අදහස් ප්‍රකාශ කළේය.