දක්ෂිණ අන්තර්ජාතික පොත් ප්‍රදර්ශනය මෙම මස 15දා සිට

දකුණු පළාත් සංවර්ධන අධිකාරිය සංවිධානය කරන දක්ෂිණ අන්තර්ජාතික පොත් ප්‍රදර්ශනය මේ මස 15, 16, 17, සහ 18 යන දිනයන්හි  පෙ.ව. 9.00 සිට ප.ව. 9 දක්වා ගාල්ල නගර ශාලාවේදී පැවැත්වේ.

‘දැනුම ධනය කරගත් පරපුරක් උදෙසා දකුණේ පොත් වසන්තය යන තේමාවෙන් යුතුව පැවැත්වෙන මෙම පොත් ප්‍රදර්ශනය හා සල්පිලට  දිවයිනේ ප්‍රමුඛ පොත් ප්‍රකාශක සමාගම් මෙන්ම ජාත්‍යන්තර පොත් ප්‍රකාශකයන් රැසක් සහභාගීවීමට නියමිතය.

මෙහි සමාරම්භක උත්සවය දකුණු පළාත් ප්‍රධාන අමාත්‍ය ෂාන් විජයලාල් ද සිල්වා මහතාගේ ප්‍රධානත්වයෙන් ජුනි 15 දින ප.ව. 9.00 ට  ප්‍රදර්ශන පරිශ්‍රයේදී පැවැත්වීමට කටයුතු යොදා තිබේ.

ප්‍රදර්ශනය පැවැත්වෙන කාලය තුළ සංස්කෘතික සංදර්ශන, මැජික් හා රූකඩ  ප්‍රසංග, ළමා  මානසික හා පෞරුෂ වර්ධන වැඩමුළු ආදී අතිරේක වැඩසටහන් රැසක්ද ඉදිරිපත් කිරීමටද සැලසුම්කර ඇත.

පොත් ප්‍රදර්ශනයෙන් ලැබෙන ආදායම උසස් අධ්‍යාපනය ලබන දරුවන්ට ශිෂ්‍යත්ව අරමුදලක් පිහිටුවීමට, දුෂ්කර පාසල්වල පුස්තකාල සංවර්ධනයට මූල්‍ය ප්‍රතිපාදන ලබාදීමට හා ගංවතුරෙන් ආපදාවට ලක්වූ දරුවන්ගේ අඩාල වූ අධ්‍යාපන කටයුතු නංවාලීමටත් සංවිධායකයෝ අපේක්ෂා කරති.

දකුණු පළාත් ප්‍රධාන අමාත්‍ය ෂාන් විජයලාල් ද සිල්වා මහතාගේ සංකල්පයක් අනුව මෙම වැඩසටහන ක්‍රියාත්මක වෙයි.