තුන්වරක් පුළුවන්ද තීන්දුව ජනපතිට

ශ්‍රේෂ්ඨාධිකරණයේ දස පුද්ගල විනිසුරු මඬුල්ලක් ජනාධිපතිවරයාට 18 වැනි ආණ්ඩුක්‍රම ව්‍යවස්ථා සංශෝධනය යටතේ තුන්වරක් තරග කළ හැකිද යන්න පිළිබඳ ජනාධිපතිවරයා විසින් ශ්‍රේෂ්ඨාධිකරණයේ මතය විමසීම සම්බන්ධයෙන් වන අධිකරණයේ මතය ඊයේ (10දා) ජනාධිපතිවරයා වෙත එවා තිබේ. 
අගවිනිසුරු මොහාන් පීරිස්, කේ.ශ්‍රී පවන්, චන්ද්‍රා ඒකානායක, ප්‍රියසාද් ඩෙප්, ඊවා වනසුන්දර, රෝහිනි මාරසිංහ, බුවනෙක අළුවිහාර, සිසිර ද ආබෘෘ, සරත් ද ආබෘෘ, ප්‍රියන්ත ජයවර්ධන යන දස පුද්ගල විනිසුරු මඬුල්ල මෙසේ ජනාධිපතිවරයා විසින් එවා තිබූ ප්‍රශ්නගත කාරණා සම්බන්ධයෙන් අධිකරණයේ පැවැති විභාගයකින් අනතුරුව ශ්‍රේෂ්ඨාධිකරණයේ මතය ජනාධිපතිවරයා වෙත යවා ඇතැයි වාර්තා වේ. 
ශ්‍රේෂ්ඨාධිකරණය හමුවේ විවිධ පුද්ගලයන් හා පාර්ශ්ව විසින් එවන ලද තිස් පහකට අධික ලිඛිත දේශන විනිසුරු මඬුල්ලේ සැලකීමට ලක් වී ඇත. මේ අන්දමට ලිඛිත දේශන ශ්‍රේෂ්ඨාධිකරණය එවූ අය අතර අගමැති දි.මූ. ජයරත්න, නීතිඥ ගෝමින් දයා ශ්‍රී, මහාචාර්ය ක්‍ෂණිකා හිරිඹුරේගම, මහාචාර්ය සුදන්ත ලියනගේ, ජනාධිපති නීතිඥ රෝමේෂ් ද සිල්වා, නීතිඥ ජේ.සී. වැලිඅමුණ ආචාර්ය විජිත නානායක්කාර, නීතිඥ සුනිල් වටගල, කේ.ඩබ්. ජනරංජන, නීතිඥ උපුල් කුමාරපෙරුම, ආචාර්ය පාතිසෝති සරවනමුත්තු ආදී පුද්ගලයෝ වෙති. 
මේ සම්බන්ධයෙන් වන විභාගය විවෘතව නොපැවැත්වීම හේතුවෙන් ශ්‍රී ලංකා නීතිඥ සංගමයේ කනස්සල් පළකල බවද වාර්තාවේ. 
ලිඛිත දේශන ඉදිරිපත් කිරීමට ශ්‍රේෂ්ඨාධිකරණය දින හතරක් ලබා දුන්නද එම දින හතරෙන් තුනක්ම නිවාඩු දිනවූ බැවින් සාධාරණ විභාගයක් සඳහා වූ ඉඩකඩ ඇහිරී ගිය බව ශ්‍රී ලංකා නිතීඥ සංගමය පවසයි.