ජනතාව මට ණය මිසක් මම ජනතාවට ණය නැහැ

“පුළුවන් තරම් පුළුවන් වෙලාවේ වැඩ කටයුතු කළොත් ඒක අපේ හිතට හොඳයි. එතකොට අපි ජනතාවට ණය නැහැ. ජනතාව මට ණය මිසක් මම නම් ජනතාවට ණය නැහැ කියා මගේ අදහසක් තියෙනවා. “ යැයි ප්‍රවාහන හා සිවිල් ගුවන්සේවා ඇමති නිමල් සිරිපාල ද සිල්වා මහතා පැවසීය.

බදුල්ල විශාඛා බලිකා විදුහලේ ස්ථාපනය කළ ස්මාට් පන්ති  කාමරය විවෘත කිරීමේ උත්සවයේදී අදහස් දක්වමින් හෙතෙම මේ බව පවසා සිටියේය.

එහිදී තවදුරටත් අදහස් දැක්වූ අමාත්‍යවරයා,

“ මට හිතෙන්නේ හරින් ප්‍රනාන්දු මහත්තයත් ටික ටික ණය ගෙවාගෙන  යනවා. මේ අවුරුදු පහ ,හය යනකොට ණය ගෙවල ඉවර කරන්න පුළුවන් කියලා. එහෙම වුණොත් අපිට හරිම සතුටුයි.

බදුල්ලේ භෞතික සම්පත් සංවර්ධනය කරන්න මම ඉතිරි කරලා නැහැ. දැන් අවශ්‍ය වන්නේ මානව සම්පත්වල අඩුව පිරවීමයි. ඒ වැඩ කෙරෙන්නේ වට්ටියෙන් ද පෙට්ටියෙන් ද කියා හොයන්න අවශ්‍ය නැහැ. ඌවේ දරුවන්ට ඉදිරියට යන්න ශක්තිය ලබාදීම අ‍පි කාගෙත් යුතුකමක්.

මම ජාතික ආණ්ඩුවේ ඇමති කෙනෙක්. මම ජාතික ආණ්ඩුවට එකතු වුණේ පටු දේශපාලන බලාපොරොත්තු ඇතිව නොවෙයි. ඊට වඩා පුළුල් ජාතික කාර්ය භාරයක් ඉටු කිරීමට අපට තියෙනවා.  මේ රට ණය බරින් මුදා ගනිමින් රටේ දරුවන්ට අධ්‍යාපනය ලබා දිය යුතුයි.  මේ රට ඉදිරියට ගෙන යනකොට මමයි හරින් ප්‍රනාන්දු මහත්තයයි දැන් එකම වේදිකාවේ ඉන්නවා. තව පැය භාගයකින් මම ගමට ගිහිල්ලා එක්සත් ජාතික පක්ෂයට විරුද්ධව මැතිවරණය  කරනවා

මෙන්න මේ සංස්කෘතිය කවුරුත් ඉදිරියට ගෙනියන්න ඕන. එකට ආණ්ඩු කරනවා වෙනම දේශපාලනය කරනවා. මේ සංස්කෘතිය ලංකාවට නුහුරුදෙයක්  වුණත් ඊට  අපි හැඩගැහෙන්න  ඕන.” යැයි ද පවසා සිටි‍යේය.