ඡන්දෙන් පසු පළාත් පාලන ආයතන පාලනය ගැන තවම තීරණයක් නැහැ

ඉදිරි පළාත් පාලන මැතිවරණයෙන් පසුව පළාත් පාලන ආයතනවල පාලනය කෙසේ පවත්වාගෙන යන්නේ දැයි මේ දක්වා තීරණයකට එළඹ නැතැයි රජයේ කැබිනට් සමප්‍රකාශක අමාත්‍ය ගයන්ත කරුණාතිලක මහතා පැවසීය.

එම මැතිවරණයෙන් ජයග්‍රහණය කිරීමට ආණ්ඩුවට හැකියාව තිබෙන බවත්, ශ්‍රී ලංකා නිදහස් පක්ෂය සහ එක්සත් ජාතික පක්ෂය එක්ව එම ආයතනවල පාලනය ගෙන යෑම සම්බන්ධව ඉදිරියේදී සලකා බලන බවත් අමාත්‍යවරයා සඳහන් කළේය.

කැබිනට් මාධ්‍ය හමුවට එක්වෙමින් කැබිනට් සමප්‍රකාශක දයාසිරි ජයසේකර මහතා සඳහන් කළේ, ඉදිරි මැතිවරණයේදී සියයට 60ක වැඩි ඡන්දයෙන් ජයග්‍රහණය කරන පක්ෂයට පමණක් පළාත් පාලන ආයතනවල බලය ලබාගත හැකි බවත්, කිසිදු පක්ෂයට එම සීමාවට ළඟාවිය නොහැකි බවත්ය.

ශ්‍රී ලංකා නිදහස් පක්ෂය, එක්සත් ජාතික පක්ෂය සහ ශ්‍රී ලංකා පොදුජන පෙරමුණ තම තමන්ට වාසිදායක තත්ත්වය අනුව  පළාත් පාලන ආයතනවල බලය හිමිකර ගනු ඇති බවද හෙතෙම පවසා සිටියේය.