ඡන්දය භාවිත කිරීමට ලක්ෂ 02කට හැඳුනුම්පත්

ඉදිරි ජනාධිපතිවරණයේදී ඡන්දය භාවිත කිරීමට අවශ්‍ය නීත්‍යනුකූල හැඳුනුම්පත් නොමැති ලක්ෂ 04කට අධික ජනතාවගෙන් ලක්ෂ 02කට නීත්‍යනුකූල හැඳුනුම්පත් සකස්කර දීමට කටයුතු කරන බව කැෆේ සංවිධානය සඳහන් කරයි.
මැතිවරණ කොමසාරිස් කාර්යාලය හා පුද්ගලයන් ලියාපදිංචි කිරීමේ දෙපාර්තමේන්තුව සමග එක්ව මෙම වැඩපිළිවෙළ ක්‍රියාත්මක කරන බවත්, මෙහිදී ජාතික හැඳුනුම්පත් ලබාගැනීමට අවශ්‍ය මුද්දර ගාස්තු, ඡායාරූප සඳහා යන වියදම සහ උප්පැන්න පිටපත් ලබාගැනීම සඳහා යන වියදම ඇතුළු හැඳුනුම්පත් සකස් කිරීමට යන අනෙකුත් සියලුම වියදම් තම සංවිධානය විසින් ලබාදෙන බවද එම සංවිධානයේ විධායක අධ්‍යක්ෂ කීර්ති තෙන්නකෝන් මහතා සඳහන් කළේය.
වලංගු හැඳුනුම්පතක් ලබාදීම යටතේ ජාතික හැඳුනුම්පත් 70,000කට අධික ප්‍රමාණයක් ලබාදීමට සැලසුම් කර තිබෙන බවත්, පොදුවේ ඡන්දය භාවිත කිරීමට අවශ්‍ය නීත්‍යනුකූල හැඳුනුම්පත් නොමැති ප්‍රමාණය ලක්ෂ 04 ඉක්මවා ඇතැයි මේ වනවිට හෙළි වී තිබෙන බවත් ඔහු පවසා සිටියේය.
මේ අනුව නීත්‍යනුකූල හැඳුනුම්පත් ලබාදීමේ වැඩපිළිවෙළ ඊයේ (12දා) සිට ආරම්භ කළ බවද හෙතෙම සඳහන් කළේය.