ගූගල් ලොක්කා ලොව උසම ගුවන් කරණම ජයගනී

ලෝකයේ උසම පැරෂුට් කරණම පසුගිය 2012 වසරේදී සිදුකළ ඔස්ට්‍රියානු ජාතික ෆෙලික්ස් බවුම්ගාට්නර්ගේ වාර්තාව බිඳ දමමින්, ලොව උසම පැරෂුට් කරණමට හිමි වාර්තාව තැබීමට ගූගල් සමාගමේ උප සභාති ඇලන් එයුස්ටේස් සමත්ව තිබේ.

දැවැන්ත හීලියම් බැලූනයක නැගී ඇමෙරිකාවේ නිව් මෙක්සිකෝවේ සිට පෘථිවි ගෝලයෙන් කිලෝමීටර් 40ක් ඉහළට ගමන් කළ ඇලන් එතැන් සිට මෙම කරණම සිදුකර තිබේ.

විශේෂයෙන්ම නිර්මාණය කළ අභ්‍යවකාශ ඇඳුමකින් සැරසී මෙසේ උඩු ගුවනට ගිය ඇලන් පැයට කිලෝමීටර් 1,300ක පමණ වේගයකින් පොළවට ළඟා වී ඇති බව කියයි.

එහිදී, ඔහු ශබ්දයේ වේගයද අභිභවා ඇති අතර, ගුවන් කරණම් ආශ්‍රිත වාර්තා කිහිපයක්ම ඔහුගේ මෙම කරණම සමග බිඳ වැටී තිබේ.

පෘථිවි ගෝලයෙන් අඩි 100,000ක් පමණ ඉහළින් පිහිටි අපරිවර්තී ගෝලය ආශ්‍රිතව පැරගන් අභ්‍යවකාශ සංවර්ධන ආයතනය විසින් සිදුකිරීමට බලාපොරොත්තු වන ගවේෂණක එක් අවස්ථාවක් ලෙස මෙම කරණමද සැලකෙයි.

කෙසේ වෙතත් මෙම දැවැන්ත කරණම වෙනුවෙන් ඇලන් වසර ගණනාවක සිට පුහුණුවීම්වල යෙදී ඇති අතර, ඔහු කරණම සිදුකළ උස අඩි 135,890ක් ලෙස සටහන් වී තිබේ.

මීට පෙර මෙම වාර්තාවට හිමිකම් කී ෆෙලික්ස් මීට වසර දෙකකට පෙර සිදුකළ එම කරණමේ උස අඩි 128,000 කි.

නිදහස් කරණමකදී වාර්තා කරන වැඩිම වේගය මෙන්ම, වැඩිම දුරක් ගමන් කළ නිදහස් කරණම යන වාර්තාවන්ද මෙහිදී ඇලන් බිඳ දමා ඇති අතර, ඔහු විනාඩි 4 තත්ත්පර 27කදී පෘථිවියට ළඟා වී තිබේ.

දක්ෂ ගුවන් නියමුවෙකු මෙන්ම, පැරෂුට් කරණම් ශූරයෙකු වන ගූගල් උප සභාපතිවරයා මෙම කරණම සඳහා රහසිගතව සූදානම් වී තිබේ.