ඉදිරියේදී දැඩි ක්‍රියාමාර්ගවලට යොමුවෙනවා - GMOA

සයිටම් ගැටලුව සම්බන්ධයෙන් ඉදිරි වැඩපිළිවෙළ ගැන සාකච්ඡා කිරීමට වෛද්‍ය නිලධාරීන්ගේ සංගමයේ මධ්‍යම කාරක සභාව අද(09දා) රැස්වූ බව එම සංගමය නිවේදනයක් නිකුත් කරමින් සඳහන් කරයි.

ඒ අනුව රජයේ ස්ථාවරය නොවෙනස් වුවහොත් මේ සම්බන්ධයෙන් ඉදිරියේදී දැඩි ක්‍රියාමාර්ගවලට ‍යොමුවන බව එම සංගමය අවධාරණය කරයි. මේ අනුව අද දින රැස්වීමෙන් පහත දැක්වෙන ආකාරයේ තීන්දු තීරණ කිහිපයක් ගෙන  ඇත.

- දැනට සිදු කරන දැනුවත් කිරීමේ වැඩසටහන් හා විරෝධතා වැඩසටහන් අඛණ්ඩව වඩාත් තීව්‍ර ලෙස සිදුකිරීම.

- මීට අමතරව අමාත්‍යවරුන් තිදෙනාගේ ක්‍රියාකලාපය පිළිබඳව ජනපතිවරයා දැනුවත් කිරීම.

- වෛද්‍ය සභාව විසින්ශ්‍රේෂ්ඨාධිකරණය ඉදිරියේ අභියාචනාවක් යොමුකිරීමට සමගාමීව නව නඩු කටයුතු ආරම්භ කිරීමට කටයුතු කිරීම.

- ජනාධිපති කමිටුව වෙත අප විසින් ලිඛිතව ඉදිරිපත් කළ යෝජනා පිළිබඳ අවසන් තීන්දු තීරණ ඉදිරි සතියක කාලය තුළ එම කමිටුව මගින් ප්‍රකාශයට පත්කිරීම.

- එම කාලසීමාව තුළ සතුටුදායක හා සාධාරණ විසඳුමක් නොලදහොත් අවශ්‍ය ඕනෑම ආකාරයක දැඩි වෘත්තීය සමිති ක්‍රියාමාර්ගවලට එළඹීම සඳහා මධ්‍යමකාරක සභාව මගින් විධායක කාරක සභාව වෙත බලය පවරන ලදී.