ඉදිරි දින දෙකේදී පවතින වැසි තත්ත්වයේ වර්ධනයක්

ජනවාරි 12 වැනිදා සහ 13 වැනිදා යන දිනවලදී දිවයිනේ පවතින වැසි තත්ත්වයේ තරමක වැඩි වීමක් බලාපොරොත්තු වන බව කාලගුණ විද්‍යා දෙපාර්තමේන්තුව පවසයි.

එසේම උතුරු, උතුරු මැද, නැගෙනහිර සහ ඌව පළාත්වල විටින් විට වැසි ඇති වන බවත්, අනෙකුත් පළාත්වල තැනින් තැන සවස 02.00න් පමණ පසු වැසි හෝ ගිගුරුම් සහිත වැසි ඇති වන බවත් එම දෙපාර්තමේන්තුව සඳහන් කරයි.

බස්නාහිර, සබරගමුව සහ මධ්‍යම පළාත්වල ඇතැම් ප්‍රදේශවල උදය කාලයේදී මීදුම් සහිත තත්ත්වයක් අපේක්ෂා කළ හැකි අතර, ගිගුරුම් සහිත වැසි ඇති වන විට එම ප්‍රදේශවල තවකාලිකව තද සුළං ඇති විය හැකිය.

අකුණු මගින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස කාලගුණ විද්‍යා දෙපාර්තමේන්තුව ජනතාවගෙන් ඉල්ලා සිටියි.