අර්ජුන ගියත් රුවන්, ප්‍රසන්න සන්ධානයේ

‍අර්ජුන රණතුංග නොව කවුරු ඉල්ලුවත් තමන්ගේ සහය ලබාදෙන්නේ ජනාධිපති මහින්ද රාජපක්ෂ මහතාට පමණක් බව බස්නාහිර පළාත් ප්‍රධාන අමාත්‍ය ප්‍රසන්න රණතුංග සහ පාර්ලිමේන්තු මන්ත්‍රී රුවන් රණතුංග යන මහත්වරු ප්‍රකාශ කළහ.

"ජනාධිපතිතුමාගේ නායකත්වයෙන් රට ලබා තියෙන ජයග්‍රහණය ආපසු හරවන්න මගේ සහෝදරයෙක් නෙවෙයි කවුරු ඉල්ලුවත් මම ඒකට ඉඩ තියන්නේ නැහැ. ඒ හින්දා මගේ තාත්තට ආදරේ කරන තාත්තා වෙනුවෙන් ලේ කඳුළු දහඩිය කැප කරපු ජනතාවට මම ප්‍රතිඥා දෙනවා මගේ මැතිවරණයටත් වඩා මහන්සිවෙලා ජනාධිපතිතුමා දිනවනවා කියලා" යැයි ප්‍රසන්න රණතුංග මහතා පැවසීය.

"සමහර කාලවලදී අපේ ආණ්ඩුවම අපිට ගැහුවා. ඒත් අපේ තාත්තා කවදාවත් පක්ෂය දාල ගියේ නෑ. අපි ඒ තාත්තාගේ පුත්තු. වතුරට වඩා ලේ ඝනකම තමයි. ඒත් පක්ෂයත් තාත්තාවත් පාවාදෙන්නේ නෑ. තාත්තා උගන්වපු ජනතා සේවය ඉදිරියට ගෙනියන්න සමහර වෙලාවට මම ආණ්ඩුව එක්ක රණ්ඩු වෙනවා. මේ ප්‍රශ්න නිසා පසුගිය අවස්ථාවල මට රෑට නින්ද ගියෙත් නෑ. මට විතරක් නෙමේ අපේ පවුලටම" යැයි රුවන් රණතුංග මහතා කියා සිටියේය.

මිනුවන්ගොඩ ශ්‍රී ලංකා නිදහස් පක්ෂ මධ්‍යම සන්ධාන රැස්වීමේදී ඔවුහු අද (16දා) දින මේ බව පැවසූහ.