අතුරුදන්වූවන්ගේ ඥාතීහු ඒ-9 මාර්ගය අවහිර කරති

යුද්ධයෙන් අතුරුදන්වූවන්ගේ ඥාතීන් විසින් කිළිනොච්චියේ ආරම්භ කරන ලද සත්‍යග්‍රහයට දින 100ක් ගතවීම හා රජයෙන් ඒ සඳහා විසඳුමක් නොලැබී හේතුවෙන් එම ඥාතීහු දහසක් පමණ අද (30දා) දහවල් ඒ-09 මාර්ගය අවහිර කරමින් විරෝධතාවක නිරත වූහ.

උතුරු පළාතේ අතුරුදන්වූවන්ගේ ඥාතීහු විශාල පිරිසක් කිළිනොච්චිය කන්දසාමි කෝවිල ඉදිරිපිට රැස්වී පළමුව රැස්වීමක් පවත්වා ඉන් අනතුරුව ඒ-09 මාර්ගය අවහිර කිරීමට තීරණය කළහ.

මෙම විරෝධතාව හේතුවෙන් එම මාර්ගයේ ඇතිවන මාර්ග තදබදය පාලනය සඳහා කිළිනොච්චිය පොලීසිය විසින් අදාළ විරෝධතාවට එරෙහිව කිළිනොච්චිය මහේස්ත්‍රාත් අධිකරණ නි‍යෝගයක් ගෙන තිබුණද, එම නියෝගය නොසලකා පිරිස විරෝධතාව පැවැත්වූහ.

මෙම අවස්ථාවට දෙමළ දේශපාලන පක්ෂවල නියෝජිතයන් වන එස්. ශ්‍රීධරන්, සෙල්වම් අඩෙයික්කලනාදන්, ආනන්ද සංගරි ඇතුළු පළාත් සභා නියෝජිතයෝ පිරිසක්ද එක්ව සිටියහ.