අතීතය අමතක කරමුයි ආණ්ඩුව කියනවා

පසුගිය ආණ්ඩු සමයේදී හොරකම, වංචා දූෂණ කළ දේශපාලඥයන්ට, නිලධාරීන්ට ආරක්ෂාව ලබාදී අතීතය අමතක කර වැඩ කරමු යැයි වර්තමාන ආණ්ඩුව පවසන බව ජනතා විමුක්ති පෙරමුණේ නායක අනුර කුමාර දිසානායක මහතා සඳහන් කළේය.

එහෙත් අතීතය අමතක කර ගමනක් නොමැති බවත්, අතීතය අමතක කළා නම් ජනවාරි 08 වැනි දින රාජපක්ෂ ආණ්ඩුව ගෙදර යැවීමට හැකියාවක් නොලැබෙන බවත් ඔහු සඳහන් කළේය.

දූෂණ විරෝධී හඬ සංවිධානය අද (23දා) සවස වංචාකරුවන්ට, දූෂිතයන්ට දඬුවම් ලබාදෙන ලෙස ඉල්ලා පැවැත්වූ විරෝධතා ව්‍යාපාරයට සහභාගී වෙමින් පක්ෂ නායකවරයා මේ බව සඳහන් කළේය.

අතීතය අමතක කර ජනතා විමුක්ති පෙරමුණට ගමනක් නොමැති බවත්, මේ නිසා අතීතයේත් වර්තමානයේත් වැරදි කළ සියලුම දෙනාට දඬුවම් ලබාදිය යුතු බවත්, එය ඉටුකරන තෙක් අරගල කරන බවද හෙතෙම වැඩිදුරටත් පවසා සිටියේය.

ඡායාරූප - ඒෂාන් ප්‍රනාන්දු