CEB සේවකයන්ට පහරදුන් අය දුරකතන සංඥා අනුව අත්අඩංගුවට

මහනුවර පොලිස් වසමේ බහිරවකන්ද ටැංකිය වත්ත ප්‍රදේශයට රාජකාරි කටයුත්තක් සඳහා ගිය ලංකා විදුලි බල මණ්ඩලයේ සෙවකයන් පිරිසකට පහරදුන් බව කියන පුද්ගලයන් තිදෙනකු අත්අඩංගුවට ගත් බව මහනුවර මූලස්ථාන පොලිසිය කියයි .

අත්අඩංගුවට ගත් පුද්ගලයන් එකම පවුලේ පිය පුතු සහ බෑනා බවද පොලිසිය කියයි . පහරදීම සිදුකිරීමෙන් පසු සැකකරුවන් එම ප්‍රදේශයෙන් පලා ගොස් තිබූ අතර ඔවුන් අත්අඩංගුවට ගැනීම සඳහා පොලීසියට දැඩි උත්සාහයක් දැරීමට සිදුවිය.

පසුව ඔවුන්ගේ ජංගම දුරකථන සඳහා සංඥා නිකුත් වන කුළුණු නිරීක්ෂණය කොට සැකකරුවන් මාවනැල්ල ප්‍රදේශයේ සැඟව සිටින බවට නිරීක්ෂණය වීමෙන් පසු ඒ ඔස්සේ විමර්ශන සිදු කළත් නැවතත් ඔවුන් මහනුවර ප්‍රදේශයට පැමිණෙමින් සිටින බවට දුරකථන සංඥා කුළුණු ඔස්සේ නිරීක්ෂණය කොට ගැටඹේ ප්‍රදේශයේදී සැකකරුවන් අත්අඩංගුවට ගැනීමට පොලීසියට හැකිව තිබේ .

මහනුවර කොට්ඨාස භාර ජ්‍යෙෂ්ඨ පොලිස් අධිකාරී සී . කේ . රත්නායක මහතාගෙන් මේ සම්බන්ධයෙන් කළ විමසීමකදී ඒ මහතා පවසා සිටියේ අයුතු ජන රාශිය , සාපරාදී පහරදීම , ඇතුළු චෝදනා කිහිපයක් යටතේ සැකකරුවන්ට එරෙහිව අධිකරණයේ කරුණු ගොනු කරුණ බවයි . සැකකරුවන් අද (21) අධිකරණයට ඉදිරිපත් කිරීමට නියමිතව තිබුණි.

ෂේන් සෙනෙවිරත්න