5 වැනි ආසියා ශාන්තිකර නිවාස සහ නාගරික සංවර්ධන අමාත්‍ය සමුළුව 3 වැනිදා

5 වැනි ආසියා ශාන්තිකර නිවාස හා නාගරික සංවර්ධන අමාත්‍යවරුන්ගේ සමුළුව (APMCHUD) නොවැම්බර් මස 03 සිට 05 වැනිදා දක්වා දකුණු කොරියාවේ සෝල් නුවරදී ආරම්භ වීමට නියමිතය.

මෙම සමුළුවට රටවල් 30 කට ආසන්න සංඛ්‍යාවක අමාත්‍යවරු ඇතුළු නිලධාරීහු, නියෝජිතයෝ සහභාගී වන අතර, ශ්‍රී ලංකාව නියෝජනය කරමින් මීට සහභාගි වීම සඳහා ඉදිකිරීම්, ඉංජිනේරු සේවා, නිවාස හා පොදු පහසුකම් අමාත්‍ය විමල් වීරවංශ මහතා හෙට (01දා) දින දකුණු කොරියාව බලා පිටත්ව යාමටද නියමිතය.

මෙවර සමුළුවේ තේමාව ‘තිරසාර සංවර්ධනය සඳහා සමාන අවස්ථා’ යන්නයි. ඒ අනුව පහත සඳහන් උප මාතෘකා යටතේ මෙම හමුවේදී කරුණු සාකච්ඡා කෙරෙනු ඇත.

සමස්ත නාගරික සැලසුම්කරණය, වරප්‍රසාද රහිත පුද්ගලයන් සඳහා සමාන අවස්ථා ලබාදීමට නාගරික පැල්පත් නවීකරණය කිරීම, මූලික සේවාවන් ලබාදීමට සමස්ත තාක්ෂණය යෙදීම, නිවාසකරණය සඳහා සමාන මූල්‍ය පහසුකම් සහ සමාන අවස්ථාවන් ලබාදීම සඳහා නාගරික සංවර්ධනය.

මෙම සමුළුවේ එක් ප්‍රධන අරමුණක් වන්නේ මෙම කරුණු මත කරනු ලබන සාකච්ඡා පදනම් කරගෙන තිරසාර සංවර්ධනයක් සඳහා සමාන අවස්ථා ලබාදීම පිණිස ක්‍රියාකාරී සැලැස්මක් කෙටුම්පත් කිරීම බව කියැවෙයි. 

මේ අනුව මෙම 5 වැනි ආසියා ශාන්තිකර නාගරික සංවර්ධනය සහ නිවාසකරණය පිළිබඳ අමාත්‍ය සමුළුවේදී විවිධ සාමාජික රටවල ප්‍රතිපත්ති සාකච්ඡාවට ලක්කෙරෙනු ඇති අතර, මෙරට ජනසෙවණ ජාතික නිවාස හා ජනාවාස සංවර්ධන වැඩසටහන මේ දක්වා  අත්පත් කරගෙන සිටින ප්‍රගතිය,  ජාතික නිවාස ප්‍රතිපත්තිය, ඉදිකිරීම් සංවර්ධන පනත පිළිබඳව ශ්‍රී ලංකාව නියෝජනය කරමින් අමාත්‍යවරයා සමුළුව ඇමතීමට නියමිතය.

ඊට අමතරව නාගරික පැල්පත් ප්‍රවර්ධනය කිරීමේ සැලසුම් සකස් කිරීම, මූලික පහසුකම් සැපයීම, නිවාස සැලසුම්කරණය, ස්වාභාවික  විපත් සහ පාරිසරික වෙනස්කම් පිළිබඳව වඩාත්  විධිමත්  ප්‍රගතියක් අත්පත් කරගැනීම සඳහා මෙම සමුළුවේදී සාමාජික රටවල් විවිධ යෝජනා ඉදිරිපත් කිරීමටද නියමිතව බව කියැවෙයි.

දෙවසරකට වරක් පැවැත්වෙන ආසියා ශාන්තිකර නිවාස සහ නාගරික සංවර්ධන අමාත්‍යවරුන්ගේ සමුළුව (APMCHUD)  ආරම්භ වූයේ  2006 වසරේදී  ඉන්දියාවේදී ය. වසර 2 කට වරක් පැවැත්වෙන මෙම සමුළුව  ඉරානය, ඉන්දුනීසියාව සහ ජෝර්දානය යන රටවල මේ වන විට පවත්වා ඇත.