සෞඛ්‍ය - අධ්‍යාපන එකතුවෙන් ඩෙංගු මඬින්න වැඩපිළිවෙළක්

සියලුම පාසල්වලට  ලබන 28 වැනිදා නිවාඩු ලබාදී පාසල් පිරිසුදු කිරීමේ දීප ව්‍යාප්ත වැඩපිළිවෙළක් දියත් කිරීමටත්, ලබන සෙනසුරාදා සහ ඉරිදා දිනවල සියලුම රාජ්‍ය ආයතන පිරිසුදු කිරීමටත් කටයුතු කරන ලෙස සෞඛ්‍ය පෝෂණ හා දේශීය වෛද්‍ය අමාත්‍ය දොස්තර රාජිත මහතා උපදෙස් ලබාදී තිබේ. 

එමෙන්ම පෞද්ගලික රෝහල්වලින්ඩෙංගු රෝගය සඳහා සිදුකරන පූර්ණ රුධිර පරීක්ෂණ වාර්තාව පැය 02 ක් ඇතුළත නිකුත් කිරීමට නොහැකි වුවහොත් ප්‍රතිකාර කිරීමට එය වලංගු නොවන බවද අමාත්‍යවරයා සඳහන් කළේය.

සේනාරත්න මහතා මේ බව පැවසුවේ, අද (21දා)  සෞඛ්‍ය අමාත්‍යාංශයේ ආයතන ප්‍රධානීන්ගේ රැස්වීමට එක්වෙමිනි.

ඇතැම් පෞද්ගලික රෝහල් පූර්ණ රුධිර පරීක්ෂණ වාර්තා නිකුත් කිරීමට පැය 02 කට වැඩි කාලයක් ගන්නා බවට වෛද්‍යවරුන්ගෙන් ලැබුණ පැමිණිලි කෙරෙහි අවධානය යොමු කරමින්  අමාත්‍යවරයා මේ බව පවසා සිටියේය.

එහිදී වැඩිදුරටත් අදහස් දැක්වූ අමාත්‍යවරයා,

“වාර්තා ප්‍රමාද වීම නිසා ප්‍රතිකාර කිරීමේදී ගැටලු මතුවන බව වෛද්‍යවරුන් පෙන්වාදී  තිබෙනවා. එමනිසා පෞද්ගලික රෝහල්වලින් පූර්ණ රුධිර පරීක්ෂණ වාර්තා පැය 02 කට පෙර නොලැබන්නේ නම් රජයේ රෝහලකට පැමිණ නොමිලේ පරීක්ෂණ කටයුතු සිදු කර ගන්නා ලෙස ජනතාවගෙන් ඉල්ලා සිටිනවා. රජයේ රෝහල්වල පැයක් තුළ පූර්ණ රුධිර පරීක්ෂණ වාර්තා ලබාදෙන අතර, කොළඹ ජාතික රෝහලේ විනාඩි 10 කින් රුධිර පරීක්ෂණ වාර්තාවක් නිකුත් කිරීමට කටයුතු යොදා තිබෙනවා.” 

ඩෙංගු රෝගය පාලනය කිරීමට දිවයින පුරා පිහිටි වරායවල ඉවත් කරන ලද බෝට්ටු විනාශ කිරීම පිළිබඳව හාදිවයින පුරා සියලුම පාසල්වල ඩෙංගු මදුරු මර්දන වැඩසටහන් සහ රාජ්‍ය ආයතනවල ඩෙංගු මදුරු මර්දන වැඩසටහන් ක්‍රියාත්මක කිරීම පිළිබඳව ද මෙහිදී සාකච්ඡා කෙරිණි.

එහිදී සෞඛ්‍ය අමාත්‍ය දොස්තර රාජිත සේනාරත්න මහතා අධ්‍යාපන අමාත්‍ය අකිල විරාජ් කාරියවසම් මහතා සමග දුරකථනයෙන් මේ පිළිබඳ සාකච්ඡා කළ අතර, එහිදී ලබන සිකුරාදා දින (28දා) පාසල් නිවාඩු ලබාදීමට තීරණය කෙරිණ.

මෙම රැස්වීමට නියෝජ්‍ය සෞඛ්‍ය අමාත්‍ය ෆයිසාල් කාසීම්, සෞඛ්‍ය ලේකම් ජනක සුගතදාස මහත්වරුන් ඇතුළු අමාත්‍යාංශයේ සියලුම නිලධාරීහු එක්ව සිටියහ.