දුගි බව තුරන් කර සාමය උදා කිරිමට සියලු දෙනා එක්විය යුතුයි - ජනපති

දුගීබව තුරන් කර සාමය උදාකර ගැනීමට ජාති, ආගම් භේදයකින් තොරව සියලූ දෙනා එක්විම අද රටේ අවශ්‍යතාව බව ජනාධිපති මෛත්‍රීපාල සිරිසේන මහතා පවසයි.

උතුම් මහමත්තුමාගේ ඉගැන්විම ද එය බව ජනාධිපතිතුමා සිහිපත් කළේ බෝරාවරුන්ගේ ගෝලීය සමුළුවට  සිය සුභාශිංසන පළ කරමිනි.

බෝරාවරුන්ගේ ගෝලීය සමුළුව පසුගියදා බම්බලපිටිය, වෙරළ මාවතේ බෝරාමස්ජිද් ප‍්‍රධාන පල්ලිය කේන්ද්‍රකර ගනිමින් ආරම්භ කෙරුණු අතර දින 10ක් පුරා පැවැත්වෙන සමුළුවේ සිවුවන දිනය වන අද (4) දින සමුළු  ශාලාව වෙත ගිය ජනාධිපතිතුමා ඔවුන් වෙත සිය සුභාශිංසනය  පිරිනැමිය.

මෙහිදී  ජනාධිපතිතුමා වැඩිදුරටත් ප‍්‍රකාශ කළේ සාමයට කැපවූ ප‍්‍රජාවක් වන බෝරාවරුන්ගේ මෙම සමුළුව මෙවර ශ‍්‍රී ලංකාවේ පැවැත්වීම රටට ගෞරවයක් බවත් ඒ වෙනුවෙන් සිය ස්තූතිය පිරිනමන බවත්ය.

 “අපට ශී‍්‍ර ලංකාව විශ්වාසය”  “We belive in Sri Lanka”  යන තේමාව යටතේ රටවල් 40ක බෝරා මුස්ලිම්වරුන් 21,000 ක සහභාගීත්වයෙන් මෙවර සමුළුව ශ‍්‍රී ලංකාවේදී පැවැත්වෙන අතර විදේශ රටවල බෝරාවරුන් 18,500ක පමණ පිරිසක් ඊට එක්ව  සිටින අතර ශ‍්‍රී ලාංකික බෝරාවරුන් 2,500ක් පමණ සහභාගී වි සිටිති.

සියලූ ජන කොටස් හා ආගමිකයන් අතර සාමය සහ විශ්වාසය ගොඩනංවමින්  ශ‍්‍රී ලංකාව තුළ ගෙන යන වැඩපිළිවෙළට ශක්තියක් ලබාදීම අන්තවාදය බැහැර කළ, සාමයට කැපවූ බෝරාවරුන්ගේ මෙම සමුළුවේ අරමුණ වන අතර ශ‍්‍රී ලංකාව සංචාරයට සහ වෙළෙදාමට සුදුසු රටක් බව ලොවට කියාපෑම ද මෙහි තවත් අරමුණකි.

ඩොලර් මිලියන 31ක විදේශ විනිමයක් මෙම සමුළුව මඟින් ශ‍්‍රී ලංකාවට ලැබි ඇති බවට ගණන් බලා ඇත.

පා.ම ෆයිසර් මුස්තාපා, වැඩබලන පොලිස්පති සී.ඞී. වික‍්‍රමරත්න යන මහත්වරුන් ඇතුළු පිරිසක් ජනාධිපතිතුමා සමග මෙම අවස්ථාවට එක්ව සිටියහ.

කෂිනි හපුආරච්චි