කැළණි ගඟ අපවිත්‍ර කරන ස්ථාන 1374ක්

සීතාවක සිට පෑලියගොඩ දක්වා ප්‍රදේශය තුළ කැළණි ගඟ  අපවිත්‍ර කරන ස්ථාන 1374ක් හඳුනාගෙන තිබෙනවා යැයි පරිසර අමාත්‍ය මහින්ද අමරවීර මහතා පවසයි.

සීතාවක සිට පෑලියගොඩ දක්වා ප්‍ර දේශය තුළ කැළණිගඟට අපද්‍රව්‍ය බැහැර කරන ස්ථාන 1374ක් ඇති බවත්, එම ප්‍ර දේශය තුළ පිහිටා ඇති කර්මාන්ත ශාලා 7000කින් 3000ක්ම පරිසර බලපත් ලබා ගෙන නොමැති බවත් පරිසර අමාත්‍ය මහින්ද අමරවීර මහතා ප්‍රකාශ කළේය.

අමාත්‍යවරයා මෙම අදහස් පළ කළේ කැළණි ගඟ අපවිත්‍ර කරනු ලබන ස්ථාන හඳුනා ගැනීම සඳහා අද දින (09) කැළණි ගඟේ සිදු කරන ලද නිරීක්ෂණ චාරිකාවකට සහභාගි වෙමිනි. නාවික හමුදාව, මධ්‍යම පරිසර අධිකාරිය ඇතුළු අංශ ගණනාවක් සමග එක්ව මෙම නිරීක්ෂණ චාරිකාව සංවිධානය කරනු ලැබීය.

මධ්‍යම පරිසර අධිකාරිය විසින් අපේ රටේ සමස්ත ගංගා පද්ධතියම ආවරණය වන පරිදි දීප ව්‍යාප්ත සමීක්ෂණයක් මේ වන විට සිදු කර තිබෙන අතර එම සමීක්ෂණයේ ප්‍රතිපල අනුව අපේ රටේ දූෂිතම ගංගාව වන්නේ කැළණි ගංගාව බවත්, ගම්පහ හා කොළඹ ජනගහනයෙන් සියයට 80කට වඩා පානීය ජල අවශ්‍යතා සපුරා ගන්නේ මෙම ගංගාවෙන් බවත් අමාත්‍යවරයා අවධාරණය කළේය.

වැඩිදුරටත් අදහස් පළ කළ අමාත්‍යවරයා-

මෙතෙක් ලොව කිසිදු රටක් තමන්ගේ රටේ ඇති සමස්ත ගංගා පද්ධතිය සංරක්ෂණයට වැඩ සටහන් ක්‍රියාත්මක කර නැහැ. ඉන්දියානු රජය  විසින්  පවිත්‍ර  ගංගා වැඩ සටහන යටතේ සංරක්ෂණය කළේ ගංගා නම් ගඟ පමණයි. සිංගප්පුරුවත් එක් ගඟක් පමණයි. නමුත් අපි පරිසර අමාත්‍යාංශය වශයෙන් ආරම්භ කළ සුරකිමු ගංගා වැඩ සටහන යටතේ අපේ රටේ ඇති ගංගා 103ම සංරක්ෂණයට අවධානය යොමු කර තිබෙනවා. ඒ සඳහා 2021 වසරේ රුපියල් මිලියන 200ක් ලබා දුන්නා. ඒ වගේම 2022 සඳහා එම මුදල රුපියල් මිලියන 2000 දක්වා වැඩි කර තිබෙනවා.

අපේ රටේ ගංගා 103ක් තිබෙනවා. මධ්‍යම පරිසර අධිකාරිය විසින් සිදු කළ දීප ව්‍යාප්ත සමීක්ෂණය අනුව සමස්ත ගංගා පද්ධතියම අපවිත්‍ර කරනු ලබන ස්ථාන 10,733ක් වාර්තා වෙනවා.

අපේ ගංගා පද්ධතියෙන් දූෂිතම ගංගාව වන්නේ කැළණි ගඟයි.  කොළඹ නගරය ආශ්‍රිතව කැළණි ගඟ දූෂණය වන ස්ථාන ස්ථාන 797කුත්, ගම්පහ දිස්ත්‍රික්කය ආශ්‍රිතව ස්ථාන 577 කුත් ඇතුළත්ව ස්ථාන 1374ක්  මගින් කැලණි ගඟට දුෂිත අපද්‍රව්‍ය  එක්රැස් වන බව තහවුරු කර ගත්තා.

එමනිසා මම සුරකිමු ගංගා වැඩ සටහන යටතේ ලබන වසරේ දී කැළණි ගඟට ප්‍රමුඛත්වය ලබා දීමට පියවර ගන්නා ලෙස උපදෙස් දුන්නා. ඒ වගේම මැණික් ගඟත් වළවේ ගඟත් සංරක්ෂණයට අප මූලිකත්වය දෙනවා. මේ අනුව මෙම වසරේ 2021 වසරට වෙන් කළ මුදලින් දිස්ත්‍රික්ක 24ටම අපි මුල්‍ය ප්‍රතිපාදන ව්‍යාපෘති සඳහා වෙන් කළා. නමුත් 2022 වසරේ කැලණි ගඟේ ජලය පිරිසිදු කිරීම සඳහා බලපාන ව්‍යාපෘති ගණනාවක් අපි ක්‍රියත්මක කරනවා. අද මෙම නිරීක්ෂණ චාරිකාව සිදු කරන්නේ ඒ නිසා යැයිද අමාත්‍යවරයා කීය.

එමෙන්ම සීතාවක කර්මාන්ත පුරයේ සිට කැලණි ගඟට අපද්‍රව්‍ය බැහැර කිරීම පාලනය සඳහා විශේෂ වැඩ පිළීවෙළක් ද අරඹන බවත් අමාත්‍යවරයා සඳහන් කළේය.