කොරෝනා රට තුළට පැමිණීම වැලැක්වීමට රජය විධිමත් වැඩපිළිවෙලක් ක්‍රියාත්මක කළ යුතුයි - මනුෂ

චීනයෙන් වාර්තා වූ කොරෝනා වෛරසය මේ වනවිට කලාපයේ රටවල් කිහිපයකට ව්‍යාප්තවී තිබෙන අතර රට තුළට වෛරසය ඇතුළුවිම  වැලැක්වීම සදහා වහාම විධිමත් හා කාර්යක්ෂම වැඩපිළිවෙලක් ක්‍රියාත්මක කළ යුතු යැයි ගාල්ල දිස්ත්‍රික් පාර්ලිමේන්තු මන්ත්‍රී මනුෂ නානායක්කාර රජයට තරයේ අවධාරණය කර සිටියි.

නිවේදනයක් නිකුත් කරමින් ඔහු මේ බව අවධාරණය කර තිබේ.

එහි වැඩිදුරටත් කරුණු දක්වන මන්ත්‍රීවරයා,

 "චීනයෙන්  වාර්තා වූ කොරෝනා වෛරසය මේ වන විට කලාපයේ රටවල් කිහිපයකට ව්‍යාප්තවී තිබෙන අතර රට තුළට වෛරසය ඇතුළුවීම වැලැක්වීම සදහා රජය  වහාම විධිමත් හා     කාර්යක්ෂම වැඩපිළිවෙලක් ක්‍රියාත්මක කළ යුතුයි.

චීනයේ සිට ශ්‍රී ලංකාව දක්වා තවමත් සෘජු ගුවන් ගමන් ක්‍රියාත්මක වන අතර චීනයේ සිට සැලකිය යුතු ගුවන් මගීන් ලංකාවට දිනපතා පැමිණේ. ඒ අතරම චීන සංචාරකයින් විශාල සංඛ්‍යාවක් දිනපතා ලංකාවේ සංචාරයට පැමිණේ. මීට අමතරව කොළඹ ආශ්‍රිතව සිදුකරන ඉදිකිරීම් ක්ෂේත්‍රයේ රැකියා සදහා චීන ජාතිකයින් විශාල වශයෙන් ලංකාවට ගෙන්වාගෙන තිබේ. මෙම වෛරසය ලංකාවට ඇතුළුවීමට හැකි ප්‍රධානම මාර්ගය වන්නේ චීනයේ සිට පැමිණෙන මගීන් හරහාය.

එහෙත් චීනයේ සිට ලංකාවට පැමිණෙන මගීන් සංඛ්‍යාව පාලනය කිරීමට හෝ චීනය හා ලංකාව අතර පවතින සෘජු ගුවන් ගමන් නතර කිරීමට මේ වන තෙක් රජය කටයුතු කර නැත. මේ නිසා වහාම චීනයේ සිට පැමිණෙන මගීන් හා ගුවන් ගමන් සංඛ්‍යාව වහාම පාලනය කිරීමට රජය කටයුතු කළ යුතුව ඇත. කොරෝනා වෛරසය චීනය තුළ පාලනය වන තෙක් ඉදිකිරීම් ක්ෂේත්‍රයේ රැකියා සදහා චීන ජාතික කම්කරුවන් ලංකාවට ගෙන්වා ගැනීම වහාම අත්හිටුවීමටද රජය කටයුතු කළ යුතුව ඇත.

ශිඝ්‍රයෙන්  ව්‍යාප්තවිය හැකි වෛරසයෙන් ලංකාවේ ජනතාව බේරාගැනීම සදහා වහාම කටයුතු කළ යුතු බවත්, වෛරසය ලංකාවට පැමිණිය හැකි සියලුම මාර්ග වසා දැමීමට කටයුතු කළ යුතු බවත් නැවත වරක් රජයට තරයේ අවධාරණය කර සිටිමි"  යැයි මන්ත්‍රීවරයා වැඩිදුරටත් සඳහන් කළේය.