වලව සුපර්ක්‍රොස් හිදී රුමීෂ - උෂාන් දක්ෂතා දක්වති

යුද හමුදා යාන්ත්‍රික හා ඉංජිනේරු බලකාය සමගින් ශ්‍රී ලංකා යතුරුපැදි සමාජය එක්ව 09 වැනි වරට සංවිධානය කළ 'වලව සුපර්ක්‍රොස්' මෝටර් රථ හා යතුරුපැදි ධාවන තරගාවලිය උඩවලව ජාතික වන උද්‍යානය අසල පිහිටි යුද හමුදා ධාවන පථයේදී පෙරේදා (22දා) පැවැත්විණි.

මෙහිදී එස්.එල්.ජී.ටී. කාණ්ඩයේ (සි.ධා. 3500 දක්වා) මෝටර් රථ ඉසව්වේ වැඩි දස්කම් දැක්වූ උෂාන් පෙරේරා දක්ෂතම මෝටර් රථ රියැදුරා ලෙස සම්මාන දිනාගත් අතර, දක්ෂතම ධාවකයා ලෙස එම්.එක්ස්. කාණ්ඩයේ (සි.ධා. 125 සිට 250 දක්වා) යතුරුපැදි ඉසව්වේ ඉහළ දස්කම් දැක්වූ රුමීෂ බුල්ජන්ස් මෙවර සම්මාන දිනා ගත්තේය.

මේ අතර එස්.එම්. කාණ්ඩයේ සුපර් මෝටාඩ් යතුරුපැදි ඉසව්වේ ආධිපත්‍යය තහවුරු කරගෙන සිටි ඉමල් මංචනායකට අභියෝග කරමින් එම ඉසව්වේ ශූරතාව දිනා ගැනීමට දේශාන් සෝලංකි සමත් වූයේ ‘%ආනන්ද වෙඩිසිංහ අනුස්මරණ කුසලානය’ හිමි කර ගනිමිනි.

එමෙන්ම මෙවර තරගාවලියේදී අශාන් සිල්වාගේ රථය අනතුරට ලක්වීම හේතුවෙන් ඔහුට එස්.එල්.ජී.ටී. කාණ්ඩයේ (සි.ධා. 3500 දක්වා) ශූරතාව අහිමි විය. ඔහු පසුගිය වසරේ දක්‍ෂතම මෝටර් රථ රියැදුරායි.

ඉසව් 24කින් සමන්විත වූ මෙම තරගාවලියට මෝටර් රථ ඉසව් 12ක් සහ යතුරුපැදි ඉසව් 12ක් ඇතුළත් වූ අතර, ඒ සඳහා දිවයිනේ ප්‍රමුඛ පෙළේ මෝටර රථ රියැදුරන් සහ යතුරුපැදිකරුවන් 200කට ආසන්න සංඛ්‍යාවක් සහභාගි වූහ.

ඡායාරූප - ශමීර රාජපක්‍ෂ