ශ්‍රී ලංකාවට රග්බි පළිහ ශූරතාව

ස්කොට්ලන්තයේ ග්ලාස්ගෝහි මේ දිනවල පැවැත්වෙන පොදුරාජ්‍ය මණ්ඩලයීය ක්‍රීඩා උලෙළේ පෙරේදා (27දා) පැවැති සත් සාමාජික රග්බි තරගාවලියේ පළිහ ශූරතාව දිනාගැනීමට ශ්‍රී ලංකා කණ්ඩායම සමත්විය. අවසන් තරගයේ දී ට්‍රිනිඩෑඩ් හා ටොබැගෝ කණ්ඩායම ලකුණු 43-07 ක් ලෙස පරාජය කරමිනි.

ජයග්‍රාහී ශ්‍රී ලංකා කණ්ඩායම පළිහ අවසන් පූර්ව වටයේදී බාබඩෝස් කණ්ඩායම ලකුණු 34-00 ක් ලෙස පරාජයට පත්කිරීමට සමත් විය. ශ්‍රී ලංකා රග්බි කණ්ඩායමක් පොදුරාජ්‍ය මණ්ඩලයීය ක්‍රීඩා තරගාවලියක දී සත් සාමාජික රග්බි අංශයෙන් ලබාගත් ඉහළම ජයග්‍රහණය මෙය වේ. සමස්ත කණ්ඩායම් වර්ගීකරණයට අනුව රටවල් 16 ක් අතරින් 9 වැනි ස්ථානයය ශ්‍රී ලංකාවට හිමිවිය.

ශ්‍රී ලංකා කණ්ඩායමේ නායකයා ලෙස ෆාසිල් මරීජා කටයුතු කළේය. යෝෂිත රාජපක්ෂ ආබාධයක් හේතුවෙන් තරගාවලියට එක්නොවීය. ඔහු වෙනුවට අනුරුද්ධ විල්වර කණ්ඩායමට එක්විය.