ශ්‍රී ලංකාවට ලකුණු 169ක දැවැන්ත පරාජයක්

(UPDATE) සංචාරක ශ්‍රී ලංකා කණ්ඩායම පරාජය කර තරග පහකින් සමන්විත එක්දින ක්‍රිකට් තරගාවලියේ අද (02දා) පැවැති පළමු තරගයෙන් ලකුණු 169ක දැවැන්ත ජයක් ලැබීමට සත්කාරක ඉන්දීය කණ්ඩායම මීට සුළුවේලාවකට පෙර සමත්විය. ලකුණු 364ක දැවැන්ත ඉලක්කයක් හඹාගිය ශ්‍රී ලංකා කණ්ඩායමට පන්දුවාර 39.2 ක් අවසානයේ සියල්ලන් දැවී රැස්කිරීමට හැකිවූයේ ලකුණු 194ක් පමණි.

ශ්‍රී ලංකාවට ලකුණු 364ක ඉලක්කයක්

ශ්‍රී  ලංකාව හා ඉන්දියාව අතර ඉන්දියාවේ කටක්හි බරබාති ක්‍රීඩාංගණයේ අද (02දා) ආරම්භවූ පළමු එක්දින තරගයේ පළමුව පන්දුවට පහරදුන් ඉන්දීය කණ්ඩායම මීට සුළු වේලාවකට පෙර නියමිත පන්දුවාර 50 අවසානයේ කඩුලු 05ක් දැවී ලකුණු 363ක් රැස්කිරීමට සමත්විය.

ඉන්දීය ඉනිම දැවැන්ත ලකුණු සංඛ්‍යාවක් කරා රැගෙන ගිය ආරම්භක පිතිකරු යුගලයවූ ශිකර් දවාන් (113) හා අජින්ඛ්‍යා රාහානේ (111) ශතක ඉනිම ගොඩනැගූහ. ශ්‍රී ලංකාව වෙනුවෙන් සුරාජ් රන්දීව් පන්දු යැවීමෙන් ලකුණු 78කට කඩුලු 03ක් දවාලූහ.

ඉන්දියාව පන්දුවාර 30ක් අවසන් වනවිට 195-0

පන්දුවාර 30ක් අවසන් වන විට පළමුව පන්දුවට පහරදෙමින් සිටින ඉන්දීය කණ්ඩායම කිසිවෙකුත් නොදැවී ලකුණු 195ක් රැස්කරගෙන සිටියි. තම දෙවැනි එක්දින ශතකය අභියස සිටින අජින්ක්‍යා රහානේ ලකුණු 97ක් (පන්දු 94) හා හයවැනි එක්දින ශතකය අභියස සිටින ශිකර් දවාන් ලකුණු 89ක් (පන්දු 87) රැස්කරගෙන සිටියි.

පළමුව පන්දුවට පහරදෙමින් සිටින ඉන්දීය ඉනිමේ පන්දුවාර 20 අවසන් වන විටත් කිසිවෙකුත් දවගැනීමට ශ්‍රී ලංකා පන්දු යවන්නන්ට නොහැකිවිය. මේ වන විට අජින්ක්‍යා රහානේ ලකුණු 47ක් හා ශිකර් දවාන් ලකුණු 36ක් රැස්කරගෙන සිටියි. තරගයේ 17.1 වැනි පන්දුවේදී තිසර පෙරේරාගේ පන්දුවක් හමුවේ රහෙන්, කුමාර් සංගක්කාර අතට උඩපන්දුවක් ලබාදුන්නද, එම අවස්ථාව සංගක්කාරට මඟහැරුණි. ඒ වන විට ඉන්දීය කණ්ඩායම ලකුණු 76/0ක් රැස්කරගෙන සිටියේය.

අජින්ක්‍යා රහානේ සමගින් ශිකර් දවාන් ඉන්දීය ඉනිම ආරම්භ කළ අතර, පන්දුවාර 10 අවසන් වන විට ඔවුන් දෙදෙනා ඉන්දීය ඉනිමට ලකුණු 43ක් එක්කළේය.

තරගයේ 6.1 වැනි පන්දුවේදී ධම්මික ප්‍රසාද් යැවූ පන්දුවක් හමුවේ දවාන් කඩුලු රකින කුමාර් සංගක්කාරට අතට තරමක් අසීරු උඩපන්දුවක් ලබාදුන්නද එය රැකගැනීමට නොහැකිවිය. ඒ වන විට ඉන්දීය ඉනිමේ මුලු ලකුණු 20 සම්පූර්ණ කර සිටි අතර, දවාන් ලකුණු 10 (පන්දු 22) රැස්කරගෙන සිටියේය.

ඉන්දියාව 43/0 (පන්දුවාර 10)

අජින්ක්‍යා රහානේ 15* (පන්දු 4x2)

ශිකර් දවාන් 23* (පන්දු 4x5)

ළහිරු ගමගේ 0/20 (පන්දුවාර 05)

ධම්මික ප්‍රසාද් 0/19 (පන්දුවාර 05)

ශ්‍රී ලංකාව හා ඉන්දියාව අතර ඉන්දියාවේ කටක්හි බරබාති ක්‍රීඩාංගණයේ අද (02දා) ආරම්භ වූ පළමු එක්දින තරගයේ කාසිය වාසිය දිනූ ශ්‍රී ලංකා නායක ඇන්ජලෝ මැතිව්ස් පළමුව පන්දු රැකීමට තීරණය කළේය. මෙම තරගාවලියට එක්දින තරග 5 ක් අන්තර්ගත වේ.

ඉන්දීය කණ්ඩායම

ශිකර් දවාන්, අජින්ක්‍යා රහානේ, විරාට් කෝලි (නායක), අම්බති රයිදු, සුරේෂ් රයිනා, රිද්හිනම් සහා, අක්ශාර් පටෙල්, ආර්. අශ්වින්, උමේෂ් යාදව්, වරූන් අරෝන්, ඉශාන්ට් ශර්මා

ශ්‍රී ලංකා කණ්ඩායම

ඇන්ජලෝ මැතිව්ස් (නායක), ටී.එම්. ඩිල්ශාන්, ළහිරු ගමගේ, මහේල ජයවර්ධන, සුරාජ් රන්දීව්, තිසර පෙරේරා, ධම්මික ප්‍රසාද්, සීක්කුගේ ප්‍රසන්න, අශාන් ප්‍රියන්ජන්, කුමාර් සංගගක්කාර, උපුල් තරංග