මහේලගේ සසෙක්ස් පළමු ජය ලබයි

එංගලන්තයේ පැවැත්වෙන නැට්වෙස්ට් කුසලාන විස්සයි20 ක්‍රිකට් තරගාවලියේ (NatWest t20 Blast - South Group) මහේල ජයවර්ධන නියෝජනය කරන සසෙක්ස් කණ්ඩායම එම තරගාවලියේ ලැබූ පළමු ජයග්‍රහණය වාර්තා කිරීමට ඊයේ (17දා) සමත්විය. හෝවිහි පැවැති මෙම තරගයෙන් ග්ලෝසෙස්ටර්ශෙයර් කණ්ඩායම ඔවුන් හමුවේ ලකුණු 06කින් පරාජය විය.

County ක්‍රීඩාංගණයේ   පැවැති මෙම තරගයේ පළමුව පන්දුවට පහරදුන් සසෙක්ස් කණ්ඩායම පන්දුවාර 20 අවසානයේ කඩුලු 05 ක් දැවී ලකුණු 167 ක් රැස්කිරීමට සමත්විය. එම ඉනිම ඔසවා තැබූ මහේල ජයවර්ධන ලකුණු 43 ක් රැස්කළේය. එක් හයේ පහරක් හා හතරේ පහර 06කින් අලංකාරවූ මහේලගේ ඉනිමට වැය වූයේ පන්දු 30ක් පමණි. ඔහුට අමතරව ක්‍රිෂ් නෑෂ් ලකුණු 43 (33) කින් දායක විය. ග්ලෝසෙස්ටර්ශෙයර් වෙනුවෙන් ටොම් ස්මිත් ලකුණු 23කට කඩුලු 03 ක් දවාළීය.

පිළිතුරු ඉනිම ක්‍රීඩකළ ග්ලෝසෙස්ටර්ශෙයර් ක්‍රීඩකයෝ සසෙක්ස් කණ්ඩායමෙන් ජයග්‍රහණය උදුරාගැනීමට ප්‍රබල සටනක් ලබාදුන්හ. කෙසේ නමුත් නියමිත පන්දුවාර සංඛ්‍යාව අවසානයේ ඔවුන්ට රැස්කිරීමට හැකිවූයේ ලකුණු 161/9 ක් පමණි. හමිෂ් මාෂල් පන්දු 26කදී ලකුණු 45 ක් රැස්කළත් එය ඔවුන්ට තරගය ජයගැනීමට තරම් ප්‍රමාණවත් නොවීය.