බංග්ලාදේශය ඓතිහාසික ජයක් ලබයි

සංචාරක දකුණු අප්‍රිකාව පරදා තරග තුනකින් සමන්විත එක්දින තරගාවලියේ ජය තරග 2-1 ක් ලෙස හිමිකරගැනීමට බංග්ලාදේශය සමත් විය. ඒ ඊයේ (15) ඩකා හිදී  පැවති තෙවැනි හා අවසන් එක්දින තරගයෙනුත් කඩුලු 9 ක පහසු ජයක් ලබමිනි. මෙය බංග්ලාදේශ කණ්ඩායමක් දකුණු අප්‍රිකාවට එරෙහිව එක්දින තරගාවලි ජයක් ලැබූ පළමු අවස්ථාව ලෙස ඉතිහාස ගත විය.

තරගයේ ලකුණු 169 ක ජයග්‍රාහී ඉලක්කයක් හඹා ගිය බංග්ලාදේශය පන්දුවාර 26 කදී  එක් කඩුල්ලක් දැවී එම ඉලක්කය සපුරා ගැනීමට  සමත් විය. බංග්ලාදේශය ජයග්‍රහණය කරා රැගෙන ගිය ආරම්භක පිතිකරුවන් වූ සෞම්‍යා සර්කාර් ලකුණු 90 ක්ද තමීම් ඉක්බාල් ලකුණු 61 ක් ද රැස් කළහ.
තරගයේ පළමුවෙන් පන්දුවට පහර දුන් දකුණු අප්‍රිකානු ඉනිමට වර්ෂාවෙන් බාධා පැමිණි අතර ඒ හේතුවෙන් තරගයේ එක් ඉනිමක් පන්දුවාර 40 කට සීමා කෙරිණි. ඒ අනුව දකුණු අප්‍රිකාවට සිය නියමිත පන්දුවාර 40 අවසානයේ කඩුලු 9 ක් දැවී රැස් කිරීමට හැකි වූයේ ලකුණු 168 ක් පමණි.

දකුණු අප්‍රිකාව වෙනුවෙන් ජේ.පී.දුමිනි ලකුණු 51 ක් හා ඩේවිඩ් මිලර් ලකුණු 44 ක් බැගින් රැස් කළහ. බංග්ලාදේශය වෙනුවෙන් සුපිරි පන්දු යැවීමක නිරත වූ සකිබ් අල් හසන් කඩුලු 3 ක් දවාලීය. අවසන් තරගයේ මෙන්ම තරගාවලියේ  වීරයා යන සම්මාන ද්විත්වයම හිමි වූයේ තරගාවලිය පුරාවට පිත්තෙන් දස්කම් දැක්වූ බංග්ලාදේශ ක්‍රීඩක සෞම්‍යා සර්කාර් හට යි. 

ශ්‍රී ලංකා හිටපු ක්‍රිකට් ක්‍රීඩක චන්දික හතුරුසිංහ බංග්ලාදේශය කණ්ඩායමේ පුහුණුකරු ලෙස පත් වූ පසු ඔවුන් අඛණ්ඩව හිමි කරගත් සිව්වැනි තරගාවලි ජයග්‍රහණයද මෙය වේ. මීට පෙර ඔවුන් සිය රටේදී පැවති තරගවලිවලදී සිම්බාබ්වේ, පකිස්තානය හා ඉන්දියාව පරාජයට පත්කිරීමට සමත් විය.
 තරගාවලියේ පළමු තරගයේ ජයග්‍රහණය පමණක් දකුණු අප්‍රිකාව විසින්  හිමිකරගන්නා ලදී.