දඹුල්ල ක්‍රීඩාංගණයේ ගස් කපයි

ශ්‍රී ලංකා කණ්ඩායම හා සංචාරක ඔස්ට්‍රේලියා කණ්ඩායම අතර දඹුල්ල ජාත්‍යන්තර ක්‍රිකට් ක්‍රීඩාංගණයේ අද (31දා) පැවැත්වෙන සිවුවැනි එක්දින තරගය සඳහා විශේෂ ආරක්‍ෂාවක් ක්‍රීඩාංගණයට යෙදවීමට බලධාරීන් හා පොලීසිය කටයුතු කර තිබේ.

දඹුල්ල ක්‍රීඩාංගණයේ ආසන පහසුකම් පවතින්නේ ප්‍රේක්ෂකයන් 18,000කට පමණක් වුවත්, ඉකුත් ඉරිදා (28දා) ශ්‍රී ලංකාව සහ ඔස්ට්‍රේලියාව අතර දඹුල්ලේ පැවැති තෙවැනි එක්දින තරගය නැරඹීම සඳහා නියමිත ධාරිතාව ඉක්මවා ජනකායක් පැමිණ සිටියේය. මෙම තරගයට පෙර දිනය වනවිටත් ප්‍රවේශපත් සියල්ල විකිණී අවසන්ව තිබුණද, බොහෝ පිරිසක් එදින තරගය නැරඹීමට පැමිණ සිටි අතර, ආරක්ෂිත ගේට්ටු කඩා බිඳ දමමින් ක්‍රීඩාංගණයට ඇතුළු වූහ.මෙම තත්ත්වය පාලනය කිරීමට ආරක්‍ෂක අංශවලටද දැඩි වෙහෙසක් ගැනීමට සිදුවිය. 

අතර ඉකුත් ඉරිදා (28දා)දඹුල්ල ක්‍රීඩාංගණයේ දිවා රාත්‍රී තරගයක් පැවැත්වූයේ (තෙවැනි තරගය) වසර 06කට පසුව වීම මෙතරම් විශාල ප්‍රේක්‍ෂක පිරිසක් පැමිණීමට ප්‍රධාන හේතුවක් වූ බව ක්‍රිකට් ආරංචි මාර්ග සඳහන් කරයි. කෙසේ නමුත් තරගය අවසානයේ ප්‍රේක්ෂකයන් හා පොලීසිය අතර උණුසුම් තත්ත්වයක් ඇති වූ අතර, ඒ හේතුවෙන් තත්ත්වය සමථයකට පත්කිරීමට පැයකට ආසන්න කාලයක් ගතවිය. මේ සියලු කාරණා පදනම් කරගනිමින් ක්‍රීඩාංගණයේ අද (31දා) තරගයේදී විශේෂිත ආරක්‍ෂිත වැඩපිළිවෙලක් ක්‍රියාත්මක කිරීමට කටයුතු යොදා ඇත.

මේ අතර ඉකුත් තරගයේ ප්‍රේක්‍ෂකයන් විශාල සංඛ්‍යාවක් ලැගුම්ගෙන සිටි ක්‍රීඩාංගණය වටා තිබූ ගස් ඊයේ (30දා) දිනය වනවිට කපා ඉවත් කිරීමට ක්‍රීඩාංගණ බලධාරීන් කටයුතු යොදා තිබුණි. කෙසේ නමුත් එවැනි ක්‍රියාවක් හදිසියේ සිදුකිරීම ගැන ඇතැම් පිරිස් මවිතය පළ කරයි.මේ අතර, ශ්‍රී ලංකා ක්‍රිකට් ආයතනය ඊයේ (30දා) රාත්‍රියේදී නිවේදනයක් නිකුත් කරමින් පවසා සිටියේ අද (31දා) තරගයේ ප්‍රවේශ පත්‍ර සියල්ල  විකිණී අවසන් බවයි. එම නිසා  ප්‍රවේශ පත්‍ර මිලදී ගැනීමට බලාපොරොත්තුවෙන්  තරගය පැවැත්වෙන දඹුල්ල ක්‍රීඩාංගණයේ දොරටු අවහිර නොකරන ලෙස ක්‍රිකට් ආයතනය ප්‍රේක්ෂකයන්ගෙන්  වැඩිදුරටත්  ඉල්ලා සිටියි. 

ඡායාරූප ඒෂාන් ප්‍රනාන්දු