කිවීන් පරදා එංගලන්තය අවසන් මහ සටනට

යොහාන් භාසුර නවදිල්ලිහි ෆෙරෝෂ් ෂා කොට්ලා ක්‍රීඩාංගණයේ සිට

හයවැනි විස්සයි20 ලෝක කුසලාන ක්‍රිකට් තරගාවලියේ නවදිල්ලිහි ෆෙරොෂ්ෂා කොට්ලා ක්‍රීඩාංගණයේ ඊයේ (30දා) රාත්‍රියේ පැවැති පළමු අවසන් පූර්ව තරගයෙන්  නවසීලන්ත කණ්ඩායම කඩුලු 07 කින් පරාජය කරඅවසන් මහ තරගයට සුදුසුකම් ලැබීමට එංගලන්ත කණ්ඩායම සමත් විය.

එංගලන්තය විස්සයි20 ලෝක කුසලාන තරගාවලියක අවසන් මහ තරගයට සුදුසුකම් ලැබූ දෙවැනි අවස්ථාව මෙය වේ. ඔවුන් මීට පෙර බටහිර ඉන්දීය කොදෙව්හිදී 2010 වසරේ පැවැති තෙවැනි විස්සයි20 ලෝක කුසලාන තරගාවලියේ ශූරතාව දිනා ගත්තේය.

නවසීලන්තය පළමු වටයේ තරග හතරම ජය ලැබුවද, සුපුරුදු පරිදි මෙවරද අවසන් පූර්ව තරගයෙන් අවාසනාවන්ත ලෙස තරගාවලියෙන් ඉවතට විසිවිය.

එංගලන්ත පිතිකරුවෝ ලකුණු 154 ක ජයග්‍රාහී ඉලක්කයපන්දුවාර 17.1 කදී කඩුලු03 ක් පමණ් දැවී සම්පූර්ණ කළහ.ජෝස් බට්ලර් (නොදැවී 32)සහ ජෝ රූට් (නොදැවී 27)සිවුවැනි කඩුල්ලට පන්දු 29 කදී ලකුණු 49 ක සම්බන්ධතාවක් පවත්වමින් පන්දු 17 ක් ඉතිරි කරමින් තරගය අවසන් කළහ. මෙහිදී බට්ලර් පන්දු 17 කදී ලකුණු 32 ක් රැස් කරමින් හයේ පහරකින් තරගය අවසන් කිරීම කැපී පෙනුණි.

ජේසන් රෝයි සුපිරි ඉනිමක් ක්‍රීඩා කරමින් පන්දු 44 කදී ලකුණු 78 ක් රැස්කර දෙවැනි කඩුල්ල ලෙස දැවී යනවිට සිය වගකීම උපරිමයෙන් ඉටු කර තිබුණි.ජේසන්ගේ පිත්තෙන් ගිලිහුණු හතරේ පහර 11 සහ හයේ පහර දෙකට ක්‍රීඩාංගණයට රැස්ව සිටි 40,000 කට ආසන්න ප්‍රේක්‍ෂකයෝ ප්‍රීතියෙන් ඉපිළි ගියහ.නායක ඔයින් මෝගන් පළමු පන්දුවේදීම දැවී යෑමෙන් ලකුණු 110 කට කඩුලු03 ක් බවට පත්වුවද, සෙසු පිතිකරුවන්ට ඉලක්කය වෙත සෙමින් යෑමට රෝයි පරිසරය නිර්මාණය කර තිබුණි.

එංගලන්ත ආරම්භක පිතිකරුවන් වන ජේසන් රෝයි සහ ඇලෙක්ස් හේල්ස් (20)වේගවත් ආරම්භයක් ලබා දෙමින් පන්දු 50 කදී ලකුණු 82 ක සම්බන්ධතාවක් පත්වමින් ජයග්‍රහණයට ශක්තිමත් අඩිතාලමක් දැමූහ.

එංගලන්ත කණ්ඩායමේ ඇරයුමෙන් පළමුව පන්දුවට පහරදුන් නවසීලන්ත කණ්ඩායම පන්දුවාර 20 අවසානයේ කඩුලු 08 ක් දැවී ලකුණු 153 ක් රැස්කිරීමට සමත්විය. ඉදිරි පෙළ පිතිකරුවෝ පළමු  පන්දුවාර 10 යේදී ලකුණු 89 ක් රැස්කිරීමට සමත් වුවද මැද පෙළ සහ පසුපෙළ කිසිදු පිතිකරුවෙකු ලොකු ඉනිමක් ක්‍රීඩා කිරීමට අපොහොසත් වීමෙන් නවසීලන්ත ඉනිම ලකුණු 153 කට සීමාවිය.

කොලින් මුන්රෝ, එංගලන්ත පන්දු යවන්නන් අනපේක්‍ෂිත ප්‍රහාරයකට ලක්කරමින් පන්දු 32 කින් ලකුණු 46 ක් රැස් කළ අතර, මුන්රෝගේ ඉනිමට හතරේ පහර 07 ක් සහ හයේ පහරක් ඇතුළත් විය. තරගයේ වීරයා ලෙස ජේසන් රෝයි සම්මාන දිනාගත්තේය.