ඉන්දියාව SLC එකට ටොක්කක් ඇන්නාද?

2010 වසරේදී ඉන්දීය කණ්ඩායම ආසියානු තරගාවලියට සමගාමීව ශ්‍රී ලංකාවේ සිදුකළ තරග සංචාරයේදී ඉන්දීය පිතිකරුවෙකු තරග පාවාදීම් සඳහා සම්බන්ධ වූ බවට එල්ල වන චෝදනා සම්බන්ධයෙන් ශ්‍රී ලංකා ක්‍රිකට් ආයතනයෙන් තොරතුරු විමසුවද ශ්‍රී ලංකා ක්‍රිකට් ආයතනයෙන් ඒ සඳහා ප්‍රමාණවත් දායකත්වයක් ලැබී නැතැයි ඩෙකෑන් ක්‍රොනිකල් පුවත් සේවය කියයි.

මේ සම්බන්ධයෙන් ශ්‍රී ලංකා ක්‍රිකට් ආයතනයේ ප්‍රධානතම නිලධරයන් දෙදෙනා වන සභාපති ජයන්ත ධර්මදාස මහතා සහ ලේකම් නිශාන්ත රණතුංග මහතාගෙන් තරග පාවාදීම් පිළිබඳව සෙවීම සඳහා පත්කළ කමිටුව  තොරතුරු විමසා තිබුණත්, ඒ සඳහා ප්‍රමාණවත් තොරතුරු ඔවුන්ගෙන් ලැබී නැතැයිද එම පුවත් සේවය කියයි.

මෙම තරග සංචාරයේදී දඹුල්ලේ පැවැති තරග අතරතරදී ඉන්දීය කණ්ඩායමේ සුරේෂ් රයිනාගේ කාමරයට කාන්තාවක් ඇතුළු වී පසුදින අලුයම 4.00 පමණ තෙක් එහි රැදී සිටි බවට චෝදනා එල්ල වී තිබේ.

එවකට ශ්‍රී ලංකා ක්‍රිකට් ආයතනයේ ලේකම් ලෙස වර්තමාන ලේකම් නිශාන්ත රණතුංග මහතා කටයුතු කර ඇති අතර සභාපති ලෙස ජයන්ත ධර්මදාස මහතා කටයුතු කර නොතිබුණි. ඒ හේතුවන් ධර්මදාස මහතා තොරතුරු ලබාදීම ප්‍රතික්ෂේප කර තිබේ.

ඉන්දීය ප්‍රිමියර් ලීග තරගාවලියේ 2013 වසරේදී සිදුවූ තරග පාවාදීම් සොයාබැලීම සඳහා පත්කළ විනිසුරු මුකුල් මුද්ගල් කමිටුව විසින් 2010 වසරේදී සිදුවූ මෙම සිදුවීම පිළිබඳවද විමර්ශනය කරන ලදී

එම පුවත් සේවය මේ පිළිබඳව වාර්තා කරමින් සඳහන් කළේ 'ඉන්දීය ක්‍රිකට් පාලක මණ්ඩලය ටොක්කක් ඇන ශ්‍රී ලංකා ක්‍රිකට් ආයතනය නිහඬ කළාද?' යනුවෙනි.

ඩෙකෑන් ක්‍රොනිකල් ඇසුරෙනි