නායක මැතිව්ස් කණ්ඩායමේ බර කරට ගන්නේ කවදාද?

සංචාරක ශ්‍රී ලංකා කණ්ඩායම සහ සත්කාරක දකුණු අප්‍රිකානු කණ්ඩායම අතර ක්‍රියාත්මක වන තරග තුනකින් සමන්විත ටෙස්ට් ක්‍රිකට් තරගාවලියේ තෙවැනි තරගය ජොහැන්නස්බර්ග්හිදී අද (12දා) අාරම්භ වේ.

පළමු තරගයෙන් ලකුණු 206ක විශිෂ්ට ජයක් හිමිකරගත් ද. අප්‍රිකානුවෝ, දෙවැනි තරගයෙන්ද ලකුණු 282ක දැවැන්ත ජයක් හිමිකරගත්හ. ඒ අනුව ටෙස්ට් ක්‍රිකට් තරගාවලියේ තරග 2-0ක් ලෙස ජයගනිමින් දකුණු අප්‍රිකාව තරගාවලියේ ඉදිරියට පැමිණියද, ඔවුහු තරග 3-0ක තරගාවලි ජයක් අපේක්‍ෂාවෙන් අද තරග බිමට පිවිසෙති. 

ශ්‍රී ලංකා කණ්ඩායම පසුගිය තරග දෙකෙහිදී ඉදිරිපත් කළ දක්‍ෂතා සලකා බලන්නේ නම් ද.අප්‍රිකානුවන් අපේක්‍ෂාවෙන් පසුවන 3-0ක තරගාවලි ජය යථාර්ථයක් වීමට ඇති ඉඩ ප්‍රස්ථාව ඉහළය. තුන්වැනි ටෙස්ට් තරගයේ ජය කෙසේ වෙතත් ජය පැරදුමෙන් තොරව අවසන් කරගන්නට හැකි වුවහොත් පළමු සහ දෙවැනි ටෙස්ට් තරගවලට සාපේක්‍ෂව ශ්‍රී ලංකා කණ්ඩායම යම් ප්‍රමාණයකට ඉදිරියට පැමිණ ඇතැයි සතුටු විය හැකිය. ඒ සඳහා පිතිකරුවන්ගේ වැඩි දායකත්වයක් අවශ්‍යය.

දෙවැනි තරගයේ පළමු ඉනිමේ ළහිරු කුමාර පන්දු යැවීමට පැමිණියේ සිව්වැනි පන්දු යවන්නා ලෙසය. වේගයෙන් පන්දු යැවිය හැකි ඔහුව සිවුවැනි පන්දු යවන්නා ලෙස කැඳවීම නායක මැතිව්ස් වෙතින් දෙවැනි තරගයේ පළමු ඉනිමේ දී සිදුවූ විශාල අතපසුවීමකි. තරගාවලියට පෙරාතුව මැතිව්ස් සඳහන් කර සිටියේ, ළහිරු මෙම තරගාවලියේදී වැඩි පන්දුවාර සංඛ්‍යාවක් යැවීමට බලාපොරොත්තු වන බවය.

ඒ ද. අප්‍රිකානු තණතිලි වේගපන්දු යවන්නන්ට වැඩි සහායක් දක්වන බව ඔහු දැන සිටි හෙයිනි. එහෙයින් ඔහු ගැන නොසිතා කණ්ඩායම ගැන සිතුවේ නම් ළහිරු තුන්වැනි පන්දු යවන්නා ලෙස කැඳවනු නිසැකය. කෙසේ වෙතත් මැතිව්ස් දෙවැනි ඉනිමේදී එම වැරැද්ද නිවැරදි කරගත්තේය. එය දිගින් දිගටම සිදුකරන්නේ දැයි අපි බලා සිටින්නෙමු. 

එක්දින තරගවලට සාපේක්‍ෂව මැතිව්ස් ටෙස්ට් තරගවලදී පන්දු යැවීමට පැමිණිය යුත්තේ පස්වැනි පන්දු යවන්නා ලෙසය. ඒ පිතිකරුවන් දෙදෙනෙකු දීර්ඝ ලකුණු සබඳතාවක් ගොඩනගා ගනිමින් සිටින්නේ නම් පමණක් විය යුතුය. එහෙයින් සම්බන්ධතා බිඳ දමන්නෙකු ලෙස ටෙස්ට් තරග බිමේදී මැතිව්ස් පන්දු යවන්නේ නම් හොඳය. 

පළමු තරගයේදී මෙන්ම දෙවැනි තරගයේදීද ශ්‍රී ලංකා පිතිකරුවන්ගේ පන්දුවට පහරදීමේ තාක්‍ෂණය ඉතා දුර්වල තත්ත්වයක පැවතිණි. විශේෂයෙන්ම ඉදිරි පාදයේ ක්‍රීඩා කරද්දී පාදයත් පිත්තත් අතර ඇති පරතරය ඉතා වැඩිය. ද. අප්‍රිකාව වැනි රටවල ක්‍රීඩා කරද්දී මෙවැනි දුර්වලතා මගහරවා ගැනීමට ශ්‍රී ලංකා පිතිකරුවන් කටයුතු කළ යුතුය. ඒ සම්බන්ධයෙන් අවශ්‍ය උපදෙස් ලබාදීම පුහුණුකරුවන්ගේ සහ සහායකයන්ගේ වගකීමකි. එය නිවැරදිව සිදුවන අයුරු පෙනෙන්නට නැත.