'සැමට සෙවණ' ජාතික නිවාස වැඩසටහනේ තෙවසරක මෙහෙවර
නිවාස හා ඉදිකිරීම් අමාත්‍යාංශය විසින් නිවාස නොමැති ජනතාවගේ නිවාස අවශ්‍යතා සම්පූර්ණ කිරීම සඳහා ක්‍රියාත්මක කරනු ලබන 'සැමට සෙවණ' ජාතික නිවාස වැඩසටහන පසුගිය 03 වැනිදා සිය තෙවැනි වසර ඇරඹීය. මේ ලිපිය ඒ නිමිත්තෙනි.
2015 වසරේ සිට වත්මන් රජය ක්‍රියාවට නැංවූ සංවර්ධන කාර්යයන් අතුරින් දීපව්‍යාප්තව ක්‍රියාත්මක කෙරෙන නිවාස හා ජනාවාස සංවර්ධන වැඩපිළිවෙළ මුල්තැනක් ගනු ලබයි. ශ්‍රී ලංකාවේ පාරම්පරික ජනතාව බහුතර ලෙසින් ජීවත්වන ග්‍රාමීය ප්‍රදේශ තුළත්, වඩාත් සංකීර්ණ නිවාස ගැටලු පවත්නා නාගරික ප්‍රදේශ ආශ්‍රිතවත්, රටේ ආර්ථිකය ශක්තිමත් කරලීම උදෙසා සිය දායකත්වය ලබාදෙන වතුකරයේ ජනතාව උදෙසාත්, දශක කිහිපයක් ජනවාර්ගික ගැටලුවට මුහණදුන් උතුරු නැගෙනහිර ජනතාවගේ නිවාස හා ජනාවාස ගැටලු සම්බන්ධයෙන්ද විශේෂ අවධානයක් යොමු කරමින්, ඔවුන්ගේ ජන ජීවිතයට වඩාත් සමීප නිවාස හා ජනාවාස සංවර්ධන වැඩපිළිවෙළක් 2015 වසරේ සිට සැමට සෙවණ ජාතික නිවාස වැඩපිළිවෙළ තුළින් ක්‍රියාත්මක කෙරේ.
ඒ යටතේ විධිමත් නිවාස සමීක්ෂණයක් යටතේ නිවාස අහිමි ජනතාවගේ නිවාස අවශ්‍යතා සපුරාලීම ඉලක්ක කොට මෙය දියත් වේ.
උදාකළ ගම්මාන තුළ නිවාස 1773 ක් ඉදි වේ
අසූව දශකයේ සිට දිවයින පුරා ඉදිකෙරුණු නිවාස ව්‍යාපෘතිවල පවත්නා නිවාස වැඩිදියුණු කිරීමේ උදාකළ ගම්මාන සංවර්ධන වැඩසටහන සැමට සෙවණ ජාතික නිවාස වැඩසටහන යටතේ 2016 වසරේදී ආරම්භ විය. එම වැඩපිලිවෙළ යටතේ 2016 - 2017 දෙවර්ෂය තුළ නිවාස 1773 ක ඉදිකිරීම් කාර්යයන් සිදුකර ඇති අතර, ඒ සඳහා වැයකොට ඇති මුදල රුපියල් මිලියන 286,223 ක් වේ.
උතුරේ අවතැන් වූවන්ට නව ගම්මාන 49 ක්
දශක කිහිපයක යුද්ධය හේතුවෙන් උතුරේ ජනතාවට, සිය පාරම්පරික නිවහන් අහිමි විය. ඔවුන් තම පවුලේ අවශ්‍යතාවට අනුකූලව නිර්මාණය කරනු ලැබූ නිවාස සහ එය මුල්කොට ගත්තා වූ ජනාවාස නැවත නිර්මාණය කරගැනීම, උතුරු නැගෙනහිර ප්‍රදේශවල යුද්ධයෙන් අවතැන් වූ ජන කණ්ඩායමේ මූලික අවශ්‍යතාවක් විය.
මෙය වඩාත් නිවැරදිව තේරුම්ගත් සැමට සෙවණ ජාතික නිවාස වැඩපිලිවෙළ, 2017 වසරේ සිට උතුරේ අවතැන් වූ ජනතාව වෙනුවෙන් සහභාගිත්ව නිවාස සංවර්ධන වැඩපිලිවෙළ හඳුන්වාදෙනු ලැබීය. නිවාස හා ඉදිකිරීම් අමාත්‍ය සජිත් ප්‍රේමදාස මහතාගේ විශේෂ ඉල්ලීමකට අනුකූලතාව දක්වමින් රජය විසින් එම සංවර්ධන ක්‍රියාදාමය යටතේ උතුරු පළාතේ යාපනය, මන්නාරම, වවුනියාව, මුලතිව් සහ කිලිනොච්චිය යන දිස්ත්‍රික්ක තුළ නව ආදර්ශ ගම්මාන 49 ක නිවාස 2500 ක ඉදිකිරීම් කටයුතු සිදුකිරීමට අනුමැතිය ලබාදුන් අතර, මෙම නිවාස සංවර්ධන වැඩපිලිවෙළ සඳහා රාජ්‍ය මූල්‍ය ආයෝජනය රුපියල් මිලියන 1268 කි.
මෙම මුදල් ආයෝජනය තුළින් උතුරේ සියලු දිස්ත්‍රික්ක තුළ යෝජිත ආදර්ශ ගම්මාන
49 හි සියලු නිවාසයන්හි මූලික ඉදිකිරිම් කටයුතු දැනටමත් නිමකොට තිබේ. ඒ සෑම නිවසකම ඉදිකිරිම් කටයුතු සඳහා රජය, එක් නිවසකට රුපියල් ලක්ෂ 05 බැගින් ආධාර මුදලක් ප්‍රදානය කළ අතර, ජාතික නිවාස සංවර්ධන අධිකාරිය විසින් ලබාදුන් තාක්ෂණික දායකත්වය සහ ප්‍රජා දැනුවත් කිරීමේ වැඩසටහන දායක කරගනිමින් තම ශ්‍රමය හා ඉතිරි කිරීම්ද එක් කරමින් මෙම ප්‍රජාව සිය නිවාස ඉදිකර ගැනීම සිදුකරයි.
මෙම වැඩපිළිවෙළෙහි සාර්ථකත්වය හේතුවෙන් ඉදිරි වසර කිහිපය තුළදීද සහභාගිත්ව නිවාස සංවර්ධනය දායක කරගනිමින් උතුරේ ජනතාවට නිවාස පහසුකම් සැපයිමට රජය තීරණය කර ඇති අතර, 2018 වසරේ යෝජිත මෙම නිවාස සංවර්ධන වැඩපිලිවෙළ තුළින් නිවාස ඒකක 5000 ක් රුපියල් මිලියන 3000 ක මූල්‍ය ආයෝජනයකින් ඉදිකිරීමට නියමිතව ඇත.
මඩකලපුවට නිවාස 1000 ක්
උතුරු පළාතේ නිවාස සංවර්ධන වැඩපිළිවෙළෙහි සාර්ථක අත්දැකීම් පාදක කරගනිමින් නැගෙනහිර පළාතේ මඩකලපුව දිස්ත්‍රික්කය තුළ අවතැන් වූ දරු පවුල් 1000කට නිවාස පහසුකම් සැපයීම සඳහා රජය රුපියල් මිලියන 500 ක මුදලක් ආයෝජනය කළ අතර, එම මූල්‍ය ආයෝජනය මගින් මඩකලපුව දිස්ත්රික්කයේ ආදර්ශ ගම්මාන 20 ක් සහ උදාකළ ගම්මාන 15 ක් ඉදිකිරීම 2017 වසරේ දී සිදුවිය.
වැලිඔය ගම්මාන 18 ක නිවාස 1000 ක්
මුලතිව් දිස්ත්රික්කයේ වැලිඔය ප්‍රාදේශිය ලේකම් කොට්ඨාසය ගත වූ යුද සමයේදී දැඩි අභියෝගයට ලක් වූ ප්‍රදේශයක් විය. වර්තමානයේ එම ප්‍රදේශය ආශ්‍රිතව ක්‍රියාත්මක කඩිනම් සංවර්ධනයට සමගාමීව සැමට සෙවණ ජාතික නිවාස වැඩපිළිවෙළ යටතේද විධිමත් නිවාස හා ජනාවාස සංවර්ධන වැඩසටහනක් ක්‍රියාත්මක කෙරේ. එම වැඩපිළිවෙළට අනුකූලව වැලිඔය ප්‍රාදේශිය ලේකම් කොට්ඨාසයේ ආදර්ශ ගම්මාන 09 ක් හා උදාකළ ගම්මාන 09 ක ඉදිකිරීම් කටයුතු සිදු කෙරෙන අතර, එම ආදර්ශ ගම්මාන 09 තුළ ඉදි කෙරෙන නව නිවාස ප්‍රමාණය 519 කි. උදාකළ ගම්මාන 09 ආශ්‍රිතව නිවාස 565 ක සංවර්ධන කාර්යයන් සිදුකෙරේ. සමස්ත ක්‍රියාවලිය සඳහා රාජ්‍ය මූල්‍ය ආයෝජනය රුපියල් මිලියන 372 ක් වේ.
වවුනියාව බෝගස්වැව නිවාස සංවර්ධනය
වවුනියාව උතුරු කලාපයේ බෝගස්වැව පාරම්පරික ගම්මානය, යුද්ධයෙන් දැඩි ලෙසින් හානියට පත් ප්‍රදේශයකි. සැමට සෙවණ ජාතික නිවාස වැඩපිළිවෙළේ ක්‍රියාකාරීත්වය, නිවාස හා ඉදිකිරීම් අමාත්‍ය සජිත් ප්‍රේමදාස මහතාගේ මැදිහත් වීම මත බෝගස්වැව පාරම්පරික ගම්මානය හඳුනාගැනීම හඳුන්වාදීම හේතුවෙන්, අද බෝගස්වැව පාරම්පරික ගම්මානයේ ආදර්ශ ගම්මාන 06 ක නිවාස දහසකට වැඩි ප්‍රමාණයක් ඉදිකිරීම හා වැඩිදියුණු කිරීම සිදු කෙරේ. ඒ සඳහා වූ රාජ්‍ය මූල්‍ය ආයෝජනය රුපියල් මිලියන 229 කි. වකුගඩු රෝගීන් 1500කට නිවාස දිවයින පුරා විවිධ ප්‍රදේශයන්හි වකුගඩු රෝගයෙන් පීඩාවට පත් රෝගීන් සඳහා ඔවුන්ගේ ප්‍රතිකර්මයන්ට සුදුසු ආකාරයෙන් නිවසේ විවිධ උපාංග වැඩිදියුණු කිරීමත් නිවසේ ජීවත්වන සෙසු නිවාසලාභීන්ට අවශ්‍ය නිවාස පහසුකම් සපයාදීමත් අරමුණු කොට වකුගඩු රෝගයෙන් පීඩාවට පත් පවුල් සඳහා නව නිවාස සංවර්ධන වැඩසටහනක් 2017 වසරත් සමගින් හඳුන්වා දෙනු ලැබීය.
මෙම වැඩසටහන 2017 වසර තුළ අනුරාධපුර, පොළොන්නරුව, කුරුණෑගල, වවුනියාව, මාතලේ, බදුල්ල, අම්පාර, ත්‍රිකුණාමලය, මුලතිව්, මොණරාගල, රත්නපුර, ගම්පහ, කළුතර සහ මහනුවර යන දිස්ත්‍රික්කයන්ට හඳුන්වාදුන් අතර, ඒ තුළින් පවුල් 1506කට නිවාස පහසුකම් සපයා දීම සිදුවිය. එකී වැඩසටහනට රාජ්‍ය මූල්‍ය ආයෝජනය රුපියල් මිලියන 500 කි. යෝජිත මෙම නිවාස සංවර්ධන වැඩසටහන තුළින් වකුගඩු රෝගයෙන් පීඩාවට පත් රෝගීන් සඳහා සිය රෝගය සුවදායක තත්ත්වයට ගෙනඒමට සුදුසු ආකාරයෙන් සිය නිවහන, වැසිකිළිය වැනි උපාංග සකස් කරන අතර, නිවසේ සෙසු නිවාසලාභීන්ට එම නිවාස පිළිසකර කිරීම තුළින් ප්‍රතිලාභ හිමි වේ.
සම්පත් සෙවණින් පවුල් 7973කට නිවාස
ඉදිකිරීමට රුපියල් මිලියන 78 ක් අසූව දශකයේ සිට උදාගම් ව්‍යාපාරය යටතේ දිවයින පුරා නිවාස ඉදිකරලීම වෙනුවෙන් ලබාදුන් ණය මුදල් නැවත අය කරමින් එම මුදල් නව නිවාස ඉදිකිරීමට හා පවත්නා නිවාස වැඩිදියුණු කිරීම වෙනුවෙන් ප්‍රති ආයෝජනය කිරීමේ වැඩපිළිවෙළ පසුගිය තෙවසරක කාලපරිච්ඡේදය තුළදී වඩාත් විධිමත් ආකාරයෙන් සිදු විය. නිවාස හා ඉදිකිරීම් අමාත්‍ය සජිත් ප්‍රේමදාස මහතාගේ උපදෙස් පරිදි නිවාසලාභීන් විසින් නැවත ගෙවනු ලබන මුදල් ආයෝජනය කිරිමේ සම්පත් සෙවණ වැඩපිළිවෙළ සකස් කරන අතර, එකී වැඩසටහන යටතේ නව නිවාස ඉදිකිරීමට හා පවත්නා නිවාස වැඩිදියුණුව වෙනුවෙන් ණය මුදල් ප්‍රදානය කිරීම සිදු කෙරේ. එම කාර්යය මුල්කොට 2015 - 2017 වසර දක්වා පවුල් 7973කට ප්‍රතිලාභ ප්‍රදානය කර ඇති අතර, එම වැඩසටහනට ආයෝජිත මුදල රුපියල් මිලියන 878,255 කි. ශිල්ප සවියෙන් නිවාස හා ඉදිකිරීම් ක්ෂේත්‍රයට සවියක් මෙරට ඉදිකිරිම් කර්මාන්තය හා නිවාස සංවර්ධනය උදෙසා දැඩි පුහුණු ශිල්පීය අවශ්‍යතාවක් පවතී. එම තත්ත්වය වඩාත් නිවැරදිව තේරුම්ගැනීම තුළින් නිවාස හා ඉදිකිරීම් අමාත්‍ය සජිත් ප්‍රේමදාස මහතා, සැමට සෙවණ ජාතික නිවාස වැඩසටහනට සමගාමීව සැමට සෙවණ ශිල්ප සවිය වැඩසටහන හඳුන්වාදෙනු ලැබීය. එම වැඩපිළිවෙළේ මූලික අපේක්ෂාව වූයේ නිවාස සංවර්ධන වැඩසටහන ක්‍රියාත්මක කරන ප්‍රදේශවල ශිල්පීය හැකියාවන් පෙන්නුම් කරන තරුණ තරුණියන්ට වඩු හා මේසන් කර්මාන්තය මුල් කොටගත් ශිල්පීය වැඩසටහන හඳුන්වා දී ඔවුන්ට නිසි පුහුණුවක්, දීමනාවක් හිමි කර දැනුම සමගින් නිවාස සංවර්ධන කාර්යයන් හා ඉදිකිරීම් කර්මාන්තයට ඔවුන් යොමු කිරීමයි. 2016 වසරේදී මෙම වැඩසටහන යටතේ රුපියල් මිලියන 500 ක් වැය කරමින් වඩු හා මේසන් කාර්මික ශිල්පීන් 10,000 ක් සඳහා පුහුණුව ලබාදුන් අතර,2017 වසරේදී රුපියල් මිලියන 94 ක මූල්‍ය ආයෝජනයකින් ඉදි කිරීමට ඉලක්කගත ශිල්පීන් ප්‍රමාණය 1800 කි.
සෑම පවුලකටම නිවසක හිමිකම
සැමට සෙවණ ජාතික නිවාස වැඩසටහන හුදෙක්, නිවාස ඉදිකිරීමට පමණක් නොවේ. මෙතෙක් මෙරට ඉදි වූ සෑම නිවසක හිමිකම ලබාදීම රජයේ අපේක්ෂාවයි. ඒ අනුව අසූව දශකයේ සිට මෙරට ඉදි වූ සෑම නිවසකම නිවසක හිමිකම ලබාදීම සඳහා වූ විශේෂිත වැඩපිළිවෙළක් නිවාස හා ඉදිකිරිම් අමාත්‍ය සජිත් ප්‍රේමදාස මහතාගේ පුරෝගාමීත්වයෙන් ක්‍රියාවට නංවා ඇත. එකී වැඩසටහනට අනුකූලව දිවයින පුරා ඉදි වූ සියලු නිවාස ව්‍යාපෘතීන්හි නිවාසලාභීන්ට අදාළ නිවාසයන්හි අයිතිය හිමි කරදීම 2020 වසරට ප්‍රථම සිදුකිරිමට ඉලක්ක කර තිබේ. මෙම වැඩපිළිවෙළ යටතේ 2015 වසරේ සිට 2017 වසරේ වර්තමානය වනවිට නිකුත්කර ඇති සින්නක්කර ඔප්පු ප්‍රමාණය 6407 කි.
සින්නක්කර හිමිකම ඔප්පුවකින් ලබාගැනීමට අමතරව නීත්‍යනුකූලව තමන් ජීවත්වන නිවසේ අයිතිය තමන්ට ලබාගැනීමට අමතරව සිය නිවහනේ සමාජ අයිතිය හිමි කරදීම අරමුණු කොට රජය ක්‍රියාත්මක කරනු ලබන බදු ඔප්පු ප්‍රදානය කිරීමේ වැඩසටහන කොළඹ නගරය ඇතුළු නාගරික ප්‍රදේශ ආශ්‍රිතව සාර්ථකව ක්‍රියාත්මක කෙරේ. මෙම බදු සහන ලබාදීමේ වැඩපිළිවෙළ යටතේ 2016 වසරේ සහ 2017 වසරේ ලබාදුන් ඔප්පු ප්‍රමාණය 9397 කි. මේ අනුව 2015 - 2017 කාලපරිච්ඡේදය තුළ නිවාස හිමිකම් ලබාදීමේ ක්‍රියාවලිය යටතේ සින්නක්කර හා බදු ඔප්පු නිකුත් කිරීම තුළින් ප්‍රතිලාභීන් 15,804කට සහාය වී තිබේ.
දුප්පතුන්ගේ නිවාසකරණයට පිහිට වූ සෙවණ අරමුදල
අඩු ආදායම්ලාභී ජන කොටස සඳහා මෙවන් ආකාරයට රාජ්‍ය මූල්‍ය අනුග්‍රහයෙන් නිවාස ණය ප්‍රදානය කිරීමේ වැඩපිළිවෙළ ක්‍රියාත්මක කිරීමට සමගාමීව දුප්පත්කමින් අසරණභාවයට පත් වූවන් සඳහා නිවසක් ඉදිකරදීම තුළින් පිහිට වීම අරමුණු කොට අසූව දශකයේ ආරම්භ කළ සෙවණ අරමුදල වඩාත් කාර්යක්ෂ්මව ක්‍රියාත්මක කරන කාලපරිච්ඡේදයක් ලෙසින් වර්තමානය හඳුන්වාදිය හැකි වේ. පසුගිය දෙවසරක කාලය තුළදී සැමට සෙවණ ජාතික නිවාස වැඩසටහනේ සාර්ථකත්වය පිළිබඳ ප්‍රසාදයට පත් දේශීය හා විදේශීය පරිත්‍යාගශීලින් මෙම වැඩසටහන සඳහා සෙවණ අරමුදල වෙනුවෙන් මූල්‍ය පරිත්‍යාග සිදු කෙරිණි. සිය වැටුප අනෙකුත් දීමනා සෙවණ අරමුදලට නිරන්තරයෙන් පරිත්‍යාග කිරීමෙන් නිවාස හා ඉදිකිරීම් අමාත්‍ය සජිත් ප්‍රේමදාස මහතා මේ සඳහා වඩාත් නිවැරදි ආදර්ශය ලබා දී තිබේ. එවන් පරිත්‍යාග තුළින් සෙවණ අරමුදල ශක්තිමත් වන අතරතුර ජාතික ලොතරැයි මණ්ඩලය, සෙවණ ලොතරැයිය වඩාත් කාර්යක්ෂ්මව ක්‍රියාවට නැංවීම හේතුවෙන් එකී ලොතරැයි පත් අලෙවිය විශාල වශයෙන් වර්ධනය වී ඇත. ඒ සියලු මූල්‍ය දායකත්වය තුළින් 2015 වසරේ සිට මේ දක්වා එම අරමුදල් ප්‍රතිලාභ ලැබූ පවුල් ප්‍රමාණය 4399 කි. එයට සෙවණ අරමුදල ලබාදුන් මූල්‍ය දායකත්වය රුපියල් මිලියන 88.458 කි.
මධ්‍ය ආදායම්ලාභීන්ට දැරිය හැකි නිවසක්
මධ්‍ය ආදායම්ලාභීන් නිරන්තරයෙන් නිවාසකරණය සඳහා ඔවුන්ගේ ආදායමට සරිලන අයුරින් නිවසක හිමිකමක් ලබාදිම රාජ්‍ය වගකීම වුවද, එය මෙතෙක් සාර්ථකව ඉටුකරගැනීමට නොහැකි විය. ඒ පිළිබඳ අවධානය යොමු කිරීමේ ප්‍රතිඵලයක් ලෙසින් අග්‍රාමාත්‍ය රනිල් වික්‍රමසිංහ මහතාගේ උපදෙසින් රාජ්‍ය හා පෞද්ගලික අංශයේ දායකත්වයෙන් මධ්‍ය ආදායම්ලාභීන්ට නිවාස ලක්ෂ 05 ක් ඉදිකිරීමේ ජාතික නිවාස වැඩපිළිවෙළ දියත් කරනු ලැබීය. නිවාස හා ඉදිකිරීම් අමාත්‍යවරයාගේ උපදෙස් පරිදි නිවාස හා ඉදිකිරීම් අමාත්‍යාංශයේ මගපෙන්වීමෙන් ජාතික නිවාස සංවර්ධන අධිකාරිය මැදිහත්කරු ලෙසින් මෙම නිවාස සංවර්ධන වැඩසටහන ක්‍රියාත්මක කෙරෙන අතර, රජය විසින් ලබාදෙන මූලික යටිතල පහසුකම්වලින් සමන්විත ඉඩම් භාවිත කොට පෞද්ගලික අංශයේ මූල්‍ය ආයෝජනයෙන් මධ්‍ය ආදායම්ලාභීන්ට දැරිය හැකි මිලකට නිවාස ඉදිකරලීම එම නිවාස සංවර්ධන වැඩසටහන තුළින් සිදුකෙරේ.
මෙහි ප්‍රථම නිවාස ව්‍යාපෘතිය පානදුර, වාද්දුව ප්‍රදේශයේ 'සී බ්‍රීස්' නමින් ඉදි වූ අතර, මධ්‍ය ආදායම්ලාභීන්ට සරිලන අයුරින් නිවාස 196කින් සමන්විත මෙම ව්‍යාපෘතිය සඳහා ආයෝජිත මුදල රුපියල් මිලියන 1250 ක් වේ.
'ග්‍රීන්වැලි' නමින් ජල්තර හෝමාගම ප්‍රදේශයේ ඉදි වූ මෙහි දෙවැනි නිවාස ව්‍යාපෘතිය සඳහා රුපියල් මිලියන 1945 ක මුදලක් ආයෝජනය කර ඇති අතර, ඉදි වී ඇති නිවාස ප්‍රමාණය 352 කි.
රාගම, දඹුවවත්ත ප්‍රදේශයේ 'ලාවන්‍යා හයිට්ස්' නමින් ඉදිවූ මෙහි තෙවැනි නිවාස ව්‍යාපෘතිය නව නිවාස 124කින් සමන්විත වන අතර, වැය වූ මුදල රුපියල් මිලියන 750 කි.
මෙම වැඩසටහන යටතේ ඉදි වූ විශාලතම නිවාස ව්‍යාපෘතිය වන සිවුවැනි ව්‍යාපෘතිය, %මවුන්ට්ක්ලිෆර්ඩ් රේන්ජ්^ හෝමාගම ජල්තර ප්‍රදේශයේ ඉදිවන අතර, නව නිවාස 860කින් යුක්තව ඉදිවන මෙම නිවාස ව්‍යාපෘතිය වෙනුවෙන් ආයෝජිත මුදල රුපියල් 5504 ක් වේ.
මධ්‍ය ආදායම්ලාභීන් අතර බෙහෙවින් ජනප්‍රිය නිවාස ව්‍යාපෘතියක් බවට පත්ව ඇති මෙම ව්‍යාපෘතිය රාජ්‍ය හා පෞද්ගලික දායකත්වයෙන් යුක්ත වන අතර, මහනුවර පල්ලෙකැලේ ප්‍රදේශයේ හා යක්කල වැරැල්ලවත්ත ප්‍රදේශයේ තවත් නිවාස ව්‍යාපෘති දෙකක් මෙම වසර තුළදී ආරම්භ කෙරේ.
ජාතික නිවාස වැඩසටහනට වැඩි රාජ්‍ය මූල්‍ය ආයෝජනයක්
සහභාගිත්ව නිවාස සංවර්ධනය මුල්කොට වර්තමානයේ ක්‍රියාත්මක කරන සැමට සෙවණ ජාතික නිවාස වැඩපිළිවෙළ 2015 වසරේ සිට නිවාස ප්‍රතිලාභීන්ගේ අවශ්‍යතා ඉටු කරමින් සාර්ථක සංවර්ධන වැඩපිළිවෙළක් ලෙසින් ක්‍රියාවට නැංවුණු බව, ඉහත ක්‍රියාකාරකම් සාක්ෂි දරයි.
2015 වසරේ ඇරඹි මෙම ජාතික නිවාස වැඩපිළිවෙළ 2017 නොවැම්බර් මාසය වනවිට පවුල් 256,169කට නිවාස ප්‍රතිලාභ හිමිකර දී ඇති අතර, ඒ වෙනුවෙන් රාජ්‍ය මූල්‍ය ආයෝජනය රුපියල් මිලියන 16,412කට ආසන්න වේ.
මේ සියලු ක්‍රියාකාරකම් හේතුවෙන් 2018 වසරේදී රජය විසින් සැමට ජාතික නිවාස වැඩසටහන මුල් කොටගත් නිවාස සංවර්ධන කාර්යයන් වෙනුවෙන් පමණක් රුපියල් මිලියන 12,000 ක රාජ්‍ය අරමුදල් ප්‍රමාණයක් වෙන්කර දී ඇත. මෙරට ග්‍රාමීය ප්‍රදේශ තුළ මෙන්ම නාගරික හා වතුකරය හා උතුරු නැගෙනහිර ප්‍රදේශවල ජිවත්වන නිවාසලාභීන්ගේ අවශ්‍යතා ඉෂ්ට කිරීමට අදාළ අරමුදල් උපරිම වශයෙන් දායක කරගැනීම සැමට සෙවණ ජාතික නිවාස වැඩසටහනේ අපේක්ෂාව යි.
ලක්විජය සාගර පලන්සූරිය - සභාපති
ජාතික නිවාස සංවර්ධන අධිකාරිය
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
